[life]

حدیث نمبر 222
حضرت ابو موسیٰ رضی اللہ عنہ بیان کرتے ہیں کہ رسول اللہ صلی اللہ علیہ وسلم نے فرمایا: ''مومن مومن کے حق میں عمارت کی مانند ہے، جس کا ایک حصہ دوسرے حصے کو مضبوط کرتا ہے۔'' پھر آپ نے اپنے ایک پاتھ کی انگلیاں دوسرے ہاتھ کی انگلیوں میں ڈال کر دکھائیں۔''
(متفق علیہ)
توثیق الحدیث: أخرجہ البخاری(45010۔فتح)، و مسلم (2585)
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔ ۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔ ۔۔

 

[life]

حدیث نمبر 223
حضرت ابو موسیٰ رضی اللہ عنہ ہی سے روایت ہے کہ رسول اللہ صلی اللہ علیہ وسلم نے فرمایا: ''جو شخص ہماری کسی مسجد میں سے یا ہمارے کسی بازار میں سے گزرے اور اس کے پاس کوئی تیر ہو تو وہ اسے اچھی طرح سنبھال کر رکھے یا پھر اسے اس کے پیکاں کی طرف سے پکڑلے، کہیں ایسا نہ ہو کہ اس سے کسی مسلمان کو کوئی تکلیف پہنچ جائے۔''
(متفق علیہ)
توثیق الحدیث:أخرجہ البخاری(5471۔فتح)'ومسلم(2615)(124)
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔ ۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔ ۔۔

 

[life]

حدیث نمبر 224
حضرت نعمان بن بشیر رضی اللہ عنہ بیان کرتے ہیں کہ رسول اللہ صلی اللہ علیہ وسلم نے فرمایا: ''مومنوں کی مثال آپس میں ایک دوسرے کے ساتھ محبت کرنے میں، رحم کرنے میں اور ایک دوسرے کے ساتھ نرمی اور شفقت کرنے میں ایک جسم کی طرح ہے، جب اس کا ایک عضو درد کرتا ہے تو اس کا باقی سارا جسد اس کی وجہ سے بیداری اور بخار میں مبتلا رہتا ہے۔''
(متفق علیہ)
توثیق الحدیث: أخرجہ البخاری (43810۔فتح)، و مسلم (2586)
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔ ۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔ ۔۔

 

[life]

حدیث نمبر 225
حضرت ابوہریرہ رضی اللہ عنہ بیان کرتے ہیں کہ نبی صلی اللہ علیہ وسلم نے حضرت حسن بن علی کو بوسہ دیا اور اقرع بن حابس آپ کے پاس بیٹھے ہوئے تھے۔ حضرت اقرع نے کہا: "میرے دس بچے ہیں اور میں نے اس میں سے کبھی کسی ایک کو بھی بوسہ نہیں دیا۔ پس رسول اللہ صلی اللہ علیہ وسلم نے اس کی طرف دیکھا اور فرمایا: ''جو کسی پر رحم نہیں کرتا تو اس پر بھی رحم نہیں کیا جاتا۔''
(متفق علیہ)
توثیق الحدیث: أخرجہ البخاری (42610۔فتح)، و مسلم(2318)

 

[life]

۔۔۔۔۔۔ ۔۔

حدیث نمبر 226
حضرت عائشہ رضی اللہ عنہا بیان کرتی ہیں کہ کچھ اعرابی (دیہاتی) رسول اللہ صلی اللہ علیہ وسلم کی خدمت میں حاضر ہوئے تو انھوں نے کہا: کیا تم اپنے بچوں کو بوسہ دیتے ہو؟ آپ نے فرمایا: ''ہاں!" انھوں نے کہا: لیکن اللہ تعالیٰ کی قسم! ہم تو بوسہ نہیں دیتے۔ رسول اللہ صلی اللہ علیہ وسلم نے فرمایا: ''اگر اللہ نے تمہارے دلوں سے رحمت و شفقت نکال دی ہے تو پھر میں کیا اختیار رکھتا ہوں۔''
(متفق علیہ)
توثیق الحدیث: أخرجہ البخاری (42610۔فتح)، و مسلم (2317)
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔ ۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔ ۔۔

 

[life]

حدیث نمبر 227
حضرت جریر بن عبد اللہ رضی اللہ عنہ بیان کرتے ہیں کہ رسول اللہ صلی اللہ علیہ وسلم نے فرمایا: ''جو شخص لوگوں پر رحم نہیں کرتا تو پھر اللہ تعالیٰ بھی اس پر رحم نہیں کرتا۔''
(متفق علیہ)
توثیق الحدیث: أخرجہ البخاری(43810۔فتح)'ومسلم(2319)
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔ ۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔ ۔۔

 

[life]

حدیث نمبر 228
حضرت ابوہریرہ رضی اللہ عنہ سے روایت ہے کہ رسول اللہ صلی اللہ علیہ وسلم نے فرمایا: ''جب تم میں سے کوئی ایک لوگوں کو نماز پڑھائے تو اسے چاہیے کہ ہلکی (مختصر) پڑھائے، اس لیے کہ ان (نمازیوں) میں ضعیف، بیمار اور بوڑھے بھی ہوتے ہیں اور جب تم میں سے کوئی ایک خود نماز پڑھے تو پھر جتنی چاہے لمبی پڑھے۔''
(متفق علیہ)

 

[life]

ایک اور روایت میں ہے: ''اور حاجت مند بھی ہوتے ہیں''
توثیق الحدیث: أخرجہ البخاری (1992۔فتح)، و مسلم (467) (184)، والروایة الثانیة عند مسلم (467)(185)
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔ ۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔ ۔۔

 

[life]

حدیث نمبر 229
حضرت عائشہ رضی اللہ عنہا بیان کرتی ہیں کہ رسول اللہ صلی اللہ علیہ وسلم بعض اوقات ایسا عمل چھوڑ دیتے تھے، جسے کرنا آپ پسند کرتے تھے، صرف اس اندیشے سے کہ کہیں لوگ بھی اسے کرنے لگ جائیں اور پھر وہ ان پر فرض کردیا جائے۔
(متفق علیہ)
توثیق الحدیث: أخرجہ البخاری (103،فتح) و مسلم (718)
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔ ۔۔۔۔۔۔۔۔۔۔۔۔۔۔۔۔۔۔۔۔۔۔

 

[life]

حدیث نمبر 230
حضرت عائشہ رضی اللہ عنہا ہی سے روایت ہے کہ نبی صلی اللہ علیہ وسلم نے صحابہ پر مہربانی کرتے ہوئے انہیں وصال (افطار کیے بغیر مسلسل روزے رکھنے) سے منع فرمایا ''تو انھوں نے کہا: "آپ خود تو وصال کرتے ہیں؟" آپ نے فرمایا: ''میں تمہاری طرح تو نہیں ہوں، میں تو اس حال میں رات گزارتا ہوں کہ میرا رب مجھے کھلاتا پلاتا ہے۔''
(متفق علیہ)
توثیق الحدیث: أخرجہ البخاری (2024۔فتح)، و مسلم (1105)
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔ ۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔ ۔۔