[life]

حقیقت میں نزول قرآن کا اصل مقصد یہ ہی ہے کہ اس کتاب اور اس میں موجود تعلیمات ہر مسلمان کے قلب ونظر میں سماء جائیں اور اس میں بیان کردہ احکامات، ہدایت غرض جملہ اُصول وقواعد انسانی رگ وپے میں اس طرح پیوست ہوجائیں جس طرح شاخ گل میں شبنم کا نم جو اس میں شگفتگی، تازگی اور حیات نو پیدا کردیتا ہے۔۔۔ اسی طرح فرمان الٰہی انسانی روح اور انسانی قوتوں کو شگفتہ پرجوش، پرمسرت، اور نشاط انگیز بنادیتا ہے اس کی حکمت انسان میں حکیمانہ اور بصیرت افروز سوچ پیدا کرتی ہے جس سے وہ زندگی کے اعلٰی ترین مقصد کو پالینے میں کامیاب رہتا ہے لہذا جو لوگ اللہ پر ایمان رکھتے ہیں انہیں چاہئے کہ وہ ان احکامات کی پوری پوری پابندی کریں جو قرآن مجید میں بیان کئے گئے ہیں تاکہ انسانی زندگی امن وامان، سکون واطمعنان، خوش حالی اور فارغ البالی سے بسر ہو اور صالح معاشرہ وجود میں آئے جس میں ہر انسان کو ترقی اور کامیابی کی ضمانت ملے اور یہ ہی قرآن مجید کی منشاء بھی ہے یہ ہی وجہ ہےقرآن مجید معاشرتی زندگی کے اہم پہلو روشن کرتا ہے روزمرہ کے اُصول بیان کرتا ہے اور زندگی کا کوئی بھی مسئلہ ایسا نہیں جس کا حل قرآن مجید میں موجود نہ ہو۔۔۔

معاشرتی زندگی میں پاکیزہ روایات کے فروغ اور شرم وحیا کی پاسداری کے احساس کو اُجاگر کرنے کے سلسلے میں سورہ الاحزاب کی درج ذیل آیات بنیادی اہمیت کی حامل ہیں۔۔۔