[ROSE]

Talab ko ajr na doon, fikar-e-rehguzar na karoon!
Safar main ab ke hawa ko bhi hamsafar na karoon

Ubhartay doobtay sooraj se torr loon rishta
Main sham orh ke so jaon aur sahar na karoon

Ab is se barh ke bhala kya ho ehtiyat-e-wafa
Main tere sheher se guzroon, tujhe khaber na karoon!

Ye meray dard ki daulat, meri maata-e-firaaq
In ansu’on ki wazahat main umr bhar na kroon!

Ujaar shab ki khalish ban ke bann main kho jaoon
Main chandni ki tarha khud ko derbader na karoon!

Wo aik pal ko dikhai to de kaheen Mohsin
Main ja'n gunwa ke bhi us pal ko mukhtasir na karoon