[ROSE]

حضرت ابن عباس رض سے روایت ہے کہ میں نے رسول اللہ ۖ کو زمزم کا پانی پلایا تو آپ نے اسے نوش فرمایا جب کہ آپ کھڑے ہوئے تھے-
(بخاری)
تخریج: صحیح بخاری، کتاب الحج، باب ماجاء فی زمزم، ح:1637- صحیح المسلم، کتاب الاشربۃ، باب فی الشرب من زمزم قائما، ح:2027-

حضرت نزال (بن سبرہ) سے روایت ہے، فرماتے ہیں کہ حضرت علی رض (مسجد کوفہ میں) بڑے چبوترے کے دروازے پر تشریف لائے اور کھڑے ہوکرپانی پیا، پھر فرمایا، بعض لوگ کھڑے کھڑے پانی پینے کو ناپسند سمجھتے ہیں حالانکہ بلاشبہ میں نے رسول اللہ ۖ کواسی طرح کرتے (پانی پیتے) دیکھا ہے، جس طرح تم نے مجھے دیکھا کہ میں نے کیا- (بخاری)
تخریج" صحیح بخاری، کتاب الاشربۃ، باب الشرب قائما، ح:5615-

حضرت ابن عمر رض سے روایت ہے کہ ہم نبی؛ ۖ کے زمانے میں چلتے چلتے کھالیتے اور کھڑے کھڑے پانی پی لیتے تھے- (ترمذی، حسن صحیح)
تخریج: صحیح- سنن ترمذی، ابواب الاشربۃ، باب ماجاء فی النھی فی الشرب قائما، ح:188- اسے ابن حبان (موارد 1369) نے صحیح کہا ہے-

فوائد: یا صحابہ رض کا مستقل معمول نہیں تھا، بلکہ مقصود یہ بیان کرنا ہے کہ بوقت ضرورت کبھی کبھی اس طرح کرلیا کرتے تھے-