[beyond_vision]

میں خود زمیں ہوں مگر ظرف آسماں کا ہے
کہ ٹوٹ کر بھی مرا حوصلہ چٹان کا ہے


برا نہ مان مرے حرف زہر زہر سہی
میں کیا کروں کہ یہی ذائقہ زبان کا ہے


ہر ایک گھر پہ مسلط ہے دل کی ویرانی
تمام شہر پہ سایا مرے مکان کا ہے


بچھڑتے وقت سے اب تک میں یوں نہیں رویا
وہ کہہ گیا تھا ، یہی وقت امتحان کا ہے


مسافروں کی خبر ہے نہ دکھ ہے کشتی کا
ہوا کو جتنا بھی غم ہے وہ بادبان کا ہے


جو برگِ زرد کی صورت ہوا میں اڑتا ہے
وہ اک ورق بھی مری اپنی داستان کا ہے


یہ اور بات عدالت ہے بے خبر ورنہ
تمام شہر میں چرچا مرے بیان کا ہے


اثر دکھا نہ سکا اس کے دل میں اشک مرا
یہ تیر بھی کسی ٹوٹی ہوئی کمان کا ہے


بچھڑ بھی جائے مگر مجھ سے بے خبر بھی رہے
یہ حوصلہ ہی کہاں میرے بدگمان کا ہے


قفس تو خیر مقدر میں تھا مگر محسن
ہوا میں شور ابھی تک مری اڑان کا ہے


محسن نقوی

 

---