[ROSE]

Muattar muattar jo baad-e-saba hai
nabi ke paseene ka yeh mojiza hai

jahan azmatein dehar ki sar jhukayein
khuda ki kasam wo dare mustafa hai

kati ungliyan husn-e-yusuf ki khaatir
muhammad ki khaatir qamar kat gaya hai

hua hai karam jis safeene pe unka
use badhke toofaan ne sajda kiya hai

wo noor-e-mujassam rasool-e-mukarram
ki qurbaan jis pe khuda bhi hua hai

ye kisne kaha zulmaton mein ghira hoon
gulam-e-nabi hoon ziya hi ziya hai

matin uswa-e-mustafa ki badaulat
badi shaan se zindagi jee raha hai