[life]

حدیث نمبر 286
حضرت ام سلمہ رضی اللہ عنہا بیان کرتی ہیں کہ رسول اللہ صلی اللہ علیہ وسلم نے فرمایا: ''جو عورت اس حال میں فوت ہوئی کہ اس کا خاوند اس سے خوش تھا تو وہ عورت جنت میں جائے گی۔''
(اسے امام ترمذی نے روایت کیا اور کہا کہ یہ حدیث حسن ہے۔)
توثیق الحدیث:ضعیف۔ أخرجہ الترمذی (1161)، و ابن ماجہ (1854)

 

[life]

۔۔ ۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔ ۔۔

حدیث نمبر 287
حضرت معاذ بن جبل رضی اللہ عنہ سے روایت ہے کہ نبی صلی اللہ علیہ وسلم نے فرمایا: ''جب کوئی عورت دنیا میں اپنے خاوند کو تکلیف پہنچاتی ہے تو حور عین میں سے اس کی بیوی کہتی ہے: "اللہ تعالیٰ تجھے ہلاک کرے، اسے تکلیف نہ پہنچا یہ تو تمہارے پاس صرف ایک مہمان اور عنقریب یہ تمہیں چھوڑ کر ہمارے پاس آنے والا ہے۔''
(ترمذی۔ اور فرمایا یہ حدیث حسن ہے۔)
توثیق الحدیث: صحیح۔ أخرجہ الترمذی (1174)، و ابن ماجہ (2014)، و أحمد (2425)
سلیم بن عید الہلالی فرماتے ہیں کہ اس حدیث کی سند صحیح ہے کیونکہ اسماعیل بن عیاش کی شامیوں سے روایت صحیح ہوتی ہے۔ جیسا کہ علی بن المدینی، احمد ابن حنبل، بخاری، ابن معین فسوی اور عثمان بن سعید داری وغیرہم نے اس کی وضاحت کی ہے اور اس (اسماعیل) کا استاد یہاں بحیربن سعد شامی ثقہ ہے۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔ ۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔ ۔۔

 

[life]

حدیث نمبر 288
حضرت اسامہ بن زید رضی اللہ عنہ سے روایت ہے کہ نبی صلی اللہ علیہ وسلم نے فرمایا: ''میں نے اپنے بعد مردوں کے بارے میں عورتوں سے زیادہ نقصان دہ فتنہ کوئی اور نہیں چھوڑا۔'' (متفق علیہ)
توثیق الحدیث: أخرجہ البخاری (1379۔فتح)، و مسلم (2740)

 

[life]

باب 36
اہل وعیال پر خرچ کرنا


اللہ تعالیٰ نے فرمایا: ''اور باپ پر جس کا وہ بچہ ہے ان (دودھ پلانے والیوں کا) کھانا اور لباس ہے دستور کے مطابق۔'' (سورة البقرة:233)
اور فرمایا: ''اور چاہیے کہ خرچ کرے کشائش والا اپنی وسعت کے مطابق اور جس کو اس کی روزی تنگی سے ملتی ہو اس کو چاہیے کہ وہ اللہ تعالیٰ کی دی ہوئی روزی میں سے اس کے موافق خرچ کرے، اللہ تعالیٰ کسی نفس کو اس سے زیادہ کا مکلف نہیں بناتا جتنا اس نے اس کو دیا ہے۔'' (سورةالطلاق :7)
اور فرمایا: ''تم جو کچھ بھی خرچ کرو اللہ تعالیٰ تمہیں اس کا عوض عطا فرماتا ہے۔'' (سورة سبأ:39)
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔ ۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔ ۔۔

حدیث نمبر 289
حضرت ابو ہریرہ رضی اللہ عنہ سے روایت ہے کہ رسول اللہ صلی اللہ علیہ وسلم نے فرمایا: ''ایک دینار وہ ہے جسے تو اللہ کی راہ میں خرچ کرتا ہے، ایک دینار وہ ہے جو تو کسی گردن کے آزاد کرنے میں خرچ کرے، ایک دینار وہ ہے جسے تو کسی مسکین پرصدقہ کرے اور ایک دینار وہ ہے جسے تو اپنے اہل و عیال پر خرچ کرے۔ ان سب میں سے زیادہ اجر اس دینار کا ہے جو تم نے اپنے اہل وعیال پر خرچ کیا۔''
(مسلم)
توثیق الحدیث: أخرجہ مسلم(995)
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔ ۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔ ۔۔

 

[life]

حدیث نمبر 290
حضرت ابو عبد اللہ (اور بعض کے نزدیک ابو عبداللہ ثوبان بن بجدد) رضی اللہ عنہ، رسول اللہ صلی اللہ علیہ وسلم کے آزاد کردہ غلام سے روایت ہے کہ رسول اللہ صلی اللہ علیہ وسلم نے فرمایا: ''سب سے افضل دینار جو آدمی خرچ کرتا ہے وہ دینار ہے جو وہ اپنے اہل و عیال پر خرچ کرتا ہے اور پھر وہ دینار ہے جسے وہ اللہ تعالیٰ کے راستے میں اپنی سواری پر خرچ کرے اور پھر وہ دینار جسے وہ اللہ کے راستے میں اپنے ساتھیوں پر خرچ کرتا ہے۔''
(مسلم)
توثیق الحدیث:أخرجہ مسلم (994)
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔ ۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔ ۔۔

 

[life]

حدیث نمبر 291
حضرت ام سلمہ رضی اللہ عنہا بیان کرتی ہیں کہ میں نے کہا: "اے اللہ کے رسول! اگر میں ابو سلمہ کی اولاد پر خرچ کروں توکیا میرے لیے کوئی اجر ہے؟ اور میں انہیں (طلبِ رزق میں) اِدھر اُدھر پھرتے ہوئے بھی نہیں چھوڑ سکتی، آخر وہ میری اولاد ہیں" آپ نے فرمایا: ''ہاں! تم ان پر جو خرچ کرو گی تمہارے لیے اس میں اجر ہے۔''
(متفق علیہ)
توثیق الحدیث:أخرجہ البخاری (3283۔فتح)، و مسلم (1001)
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔ ۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔ ۔۔

 

[life]

حدیث نمبر 292
حضرت سعد بن ابی وقاص رضی اللہ عنہ سے (ان کی طویل حدیث میں جسے ہم پہلے کتاب کے آغاز میں "تمام اعمال ظاہری و باطنی میں حسنِ نیت و اخلاص" کے باب میں بیان کر آئے ہیں) روایت ہے کہ رسول اللہ صلی اللہ علیہ وسلم نے انہیں فرمایا: ''تم اللہ تعالیٰ کی رضا کے لیے جو بھی خرچ کرو گے تو اس کی وجہ سے تمہیں اجر دیا جائے گا حتیٰ کہ اس (لقمے) پر بھی جو تم اپنی بیوی کے منہ میں ڈالو گے۔'' (متفق علیہ)
توثیق الحدیث کیلئے حدیث نمبر (6) ملاحظہ فرمائیں۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔ ۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔ ۔۔

 

[life]

حدیث نمبر 293
حضرت ابو مسعود بدری رضی اللہ عنہ سے روایت ہے کہ نبی صلی اللہ علیہ وسلم نے فرمایا: ''جب آدمی ثواب کی نیت سے اپنے اہل و عیال پر خرچ کرتا ہے تو وہ بھی اس کیلئے صدقہ ہے۔'' (متفق علیہ)
توثیق الحدیث: أخرجہ البخاری (1361۔فتح) و مسلم (1002)
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔ ۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔ ۔۔

 

[life]

حدیث نمبر 294
حضرت عبد اللہ بن عمرو بن عاص رضی اللہ عنہ بیان کرتے ہیں کہ رسول اللہ صلی اللہ علیہ وسلم نے فرمایا: ''آدمی کے گناہ گار ہونے کیلئے یہی کافی ہے کہ وہ جن کی روزی کا ذمہ دار ہے ان کے حقوق ضائع کردے۔''
(حدیث صحیح ہے، اسے ابو داؤد وغیرہ نے روایت کیا ہے)
اور مسلم میں بھی اس کے ہم معنی روایت ہے کہ آپ نے فرمایا: ''آدمی کے گناہ گار ہونے کے لیے یہی کافی ہے کہ وہ جس کی خوراک کا ذمہ دار ہے اس سے ہاتھ روک لے۔''
توثیق الحدیث: صحیح۔ أخرجہ أبوداود (1692)، و أحمد (1602)، والروایة الثانیة عند مسلم (996)
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔ ۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔ ۔۔

 

[life]

حدیث نمبر 295
حضرت ابوہریرہ رضی اللہ عنہ سے روایت ہے کہ نبی صلی اللہ علیہ وسلم نے فرمایا: ''ہر روز جس میں بندے صبح کرتے ہیں۔ دو فرشتے نازل ہوتے ہیں، ان میں سے ایک کہتا ہے: اے اللہ! خرچ کرنے والے کو بہتر بدل عطا فرما اور دوسرا کہتا ہے: اے اللہ! روک کر رکھنے والے کے مال کو تلف فرما دے''
(متفق علیہ)
توثیق الحدیث:أخرجہ البخاری(3043۔فتح)'ومسلم(1010)
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔ ۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔ ۔۔