[’Alayna‘]

Kabhi dekhi hai maayoosi
Wo na-ummeed udaasi tum ne
Uss saail k chehre par,
K jis k kaase mein mojood
Iklote hi sikke ko,
K jo ho uss ki har ummeed ka
Markaz bhi mehvar bhi,
Koi kHoTa kahe?

Mujhe dekHo!
Wo maayoosi,wo veeraani
Meri aankhon mein kHojo
Aur udaasi wo,
Mere chehre pe tum DhoonDo
K mere kaasa-e-dil mein
Jo ik sikka kHanakta tha
K jo tha meri har chaahat,wafa ka
Markaz o mehvar
Kisi ne aaj uss iklote
Sikka-e-mohabbat ko
Yunhi kHoTa kaha hai...!

 

---