[Miss Habib]

مکیں مدتوں سے مکاں چھوڑ آئے
پہ یادوں کے انمٹ نشاں چھوڑ آئے
زباں پر ابھی تک بھی چھالے پڑے ہیں
کوئی حرف ہم درمیاں چھوڑ آئے
بھلے دشت ہو، یا کہ ہو گھر کا آنگن
“جہاں بھی گئے، داستان چھوڑ آئے”

کوئی پیش رو کو نہ مشکل پڑے گی
لہو سے بھرے ہم نشاں چھوڑ آئے

کوئی اور آوارگی کر رہا ہے
ارے ہم تو کوۓ بتاں چھوڑ آئے

بہت رہ چکے بستی_خواب میں ہم
یقیں مل گیا ہے، گماں چھوڑ آئے

مقید ہوے ذات میں آج وہ جو
ازل سے زمیں و زماں چھوڑ آئے

ابھی عشق سے ہم نبرد آزما ہیں
کئی عارضی امتحاں چھوڑ آئے

دل_گمشدہ کا پتا ہی نہیں ہے
یہاں چھوڑ آے، وہاں چھوڑ آئے؟

کمی زندگی بھر نہ پوری ہوئی وہ
جو ہم ایک پل رائگاں چھوڑ آئے

مزاحم ہوے کچھ، مگر پھر اچانک
بھنور میں ہی ہم کشتیاں چھوڑ آئے

ابھی تو برابر کا سودا ہے یارو
بہت دور سود و زیاں چھوڑ آئے

خلا میں ہی ہم ہو گئے ہیں معلق
زمیں سے گئے، آسماں چھوڑ آئے

کوئی گھر کی جانب نہ آے گا واپس
سر_دشت ایسا سماں چھوڑ آئے

زباں مصلحت میں کہیں رک گئی تھی
بیاں کے بھی پیچھے، بیاں چھوڑ آئے

فقط منتظر ہیں تمہارے ہی شاہین
وہ مقتل میں تیغ و کماں چھوڑ آئے

 

---

[SIGPIC][/SIGPIC]