[life]

ریاض الصالحین باب 40، ]والدین کے ساتھ حسن سلوک
باب 40

والدین کے ساتھ حسن سلوک اور رشتے داروں سے صلہ رحمی کرنے کا بیان


اللہ تعالیٰ نے فرمایا: ''تم اللہ تعالیٰ کی عبادت کرو اور اس کے ساتھ کسی کو شریک مت ٹھہراؤ اور والدین کے ساتھ نیک سلوک کرو، نیز رشتے داروں، یتیموں، مسکینوں، رشتے دار پڑوسی اور اجنبی پڑوسی اور پہلو کے ساتھی اور مسافر اور اپنے غلاموں کے ساتھ اچھا برتاؤ کرو" (سورة النساء:36)

اور فرمایا: ''اور اللہ تعالیٰ سے ڈرو جس کے واسطے سے تم ایک دوسرے سے سوال کرتے ہو اور قرابت داریوں (کے توڑنے) سے ڈرو۔'' (سورة النساء:1)

اور فرمایا: ''اور وہ لوگ جو ملاتے ہیں ان کے جن کو ملانے کا اللہ تعالیٰ نے حکم دیا ہے (یعنی صلہ رحمی کرتے ہیں۔'' (سورة الرعد:21)

اور فرمایا: ''اور ہم نے انسان کو والدین کے ساتھ حسن سلوک کرنے کی تاکید کی ہے۔'' (سورة العنکبوت:8)

اور فرمایا: "تیرے رب نے فیصلہ کردیا کہ عبادت صرف اور صرف ایک (رب) کی کرو اور والدین کے ساتھ اچھا سلوک کرو، اگر ان میں سے ایک یا دونوں ہی تمہاری موجودگی میں بڑھاپے کو پہنچ جائیں تو انہیں اف تک مت کہو اور نہ انہیں ڈانٹو اور (ہمیشہ) ان دونوں سے ادب کی بات کہو۔ اور ان کے آگے عاجزی کے پہلو (بازو) جھکادو نیاز مندی سے اور کہو کہ "اے رب! ان پر رحم فرما جس طرح بچپن میں انہوں نے مجھے پالا۔'' (سورة الِاسراء:23،24)
اور فرمایا: ''اور ہم نے انسان کو تاکید کی اس کے والدین کے بارے میں، اس کی ماں نے تکلیف پر تکلیف اٹھا کر اسے پیٹ میں رکھا اور دودھ چھڑانا ہے اس کا دو سال میں اور یہ کہ میرا اور اپنے والدین کاشکر ادا کر۔'' (سورة لقمان :14)
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔ ۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔ ۔۔

 

[life]

حدیث نمبر 312
ابو عبد الرحمن عبد اللہ بن مسعود رضی اللہ عنہ نے فرمایا: ''میں نے رسول اللہ صلی اللہ علیہ وسلم سے دریافت کیا کہ اللہ تعالیٰ کو کون سا عمل سب سے زیادہ محبوب ہے؟ آپ نے فرمایا: ''نماز کو بروقت ادا کرنا'' میں نے پوچھا پھر کون سا؟ آپ نے فرمایا: ''والدین کے ساتھ حسن سلوک'' میں نے پوچھا: پھر کون سا؟ آپ نے فرمایا: ''اللہ کے راستے میں جہاد کرنا۔'' (متفق علیہ)
توثیق الحدیث:أخرجہ البخاری (92۔فتح)، و مسلم (85)

 

[life]

حدیث نمبر 313
حضرت ابوہریرہ رضی اللہ عنہ بیان کرتے ہیں کہ رسول اللہ صلی اللہ علیہ وسلم نے فرمایا: ''کوئی اولاد اپنے والد (کے احسانات) کا بدلہ نہیں چکا سکتی مگر یہ کہ وہ اسے غلام پائے، تو اسے خرید کر آزاد کردے۔'' (مسلم)
توثیق الحدیث: أخرجہ مسلم (1510)
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔ ۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔ ۔۔

 

[life]

حدیث نمبر 314
حضرت ابوہریرہ رضی اللہ عنہ سے روایت ہے کہ رسول اللہ صلی اللہ علیہ وسلم نے فرمایا: ''جو شخص اللہ تعالیٰ اور یوم آخرت پر ایمان رکھتا ہے، اسے اپنے مہمان کی تکریم کرنی چاہیے اور جو شخص اللہ تعالیٰ اور یوم آخرت پر ایمان رکھتا ہے، اسے چاہیے کہ وہ صلہ رحمی کرے اور جوشخص اللہ تعالیٰ اور یوم آخرت پر ایمان رکھتاہے، اسے چاہیے کہ خیر و بھلائی کی بات کرے یا پھر خاموش رہے۔'' (متفق علیہ)
توثیق الحدیث کیلئے حدیث نمبر (308) ملاحظہ فرمائیں ۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔ ۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔ ۔۔

 

[life]

حدیث نمبر 315
حضرت ابو ہریرہ رضی اللہ عنہ ہی سے روایت ہے کہ رسول اللہ صلی اللہ علیہ وسلم فرمایا: ''یقیناً اللہ تعالیٰ نے مخلوق کو تخلیق فرمایا۔ حتیٰ کہ جب ان کی تخلیق سے فارغ ہوا تو رحم (صلہ رحمی) نے کھڑے ہوکر کہا: یہ اس شخص کا مقام ہے جو توڑے جانے سے تیری پناہ مانگے، اللہ تعالیٰ نے فرمایا: ''ہاں! کیا تم اس پر راضی نہیں کہ میں اس کے ساتھ تعلق جوڑوں جو تجھ کو جوڑے اور اس سے قطع تعلق کرلوں جو تجھ (رشتہ داری) کو قطع کرے؟" اس نے کہا: کیوں نہیں؟ (میں اس سے راضی ہوں) اللہ تعالیٰ نے فرمایا: ''پس یہ تیرے لیے ہے (ایسے ہی ہوگا)۔'' پھر رسول اللہ صلی اللہ علیہ وسلم نے فرمایا: ''اگر تم چاہو تو یہ آیت پڑھ لو ''یقیناً قریب ہے کہ جب تم کو اقتدار ملے تو تم زمین میں فساد پھیلاؤ اور اپنے رحموں (رشتوں) کو کاٹو، یہی وہ لوگ ہیں جن پر اللہ تعالیٰ نے لعنت فرمائی اور انہیں بہرا اور اندھا کردیا'' (سورۃ محمد :22،23)
(متفق علیہ)

اور بخاری کی ایک روایت میں ہے کہ اللہ تعالیٰ نے فرمایا: ''جو تجھے ملائے گا میں اسے ملاؤں گا، جو تجھے قطع کرے گا میں اسے قطع کروں گا۔''
توثیق الحدیث: أخرجہ البخاری (41710۔فتح)، و مسلم (2554)

 

[life]

حدیث نمبر 316
حضرت ابوہریرہ رضی اللہ عنہ ہی سے روایت ہے کہ ایک آدمی رسول اللہ صلی اللہ علیہ وسلم کی خدمت میں آیا تو عرض کیا: "اے اللہ کے رسول! لوگوں میں سے میرے حسن سلوک کا سب سے زیادہ مستحق کون ہے؟" آپ نے فرمایا: ''تمہاری ماں" اس نے پوچھا: "پھر کون؟" آپ نے فرمایا: "تمہاری ماں'' اس نے کہا: "پھر کون؟" آپ نے فرمایا: ''تمہاری ماں۔'' اس نے پوچھا: "پھر کون؟" آپ نے فرمایا: ''تمہارا باپ۔'' (متفق علیہ)

ایک روایت میں ہے: اے اللہ کے رسول! میرے حسنِ سلوک کا سب سے زیادہ حقدار کون ہے؟ آپ نے فرمایا: ''تمہاری ماں، پھر تمہاری ماں، پھر تمہاری ماں، پھر تمہارا باپ اور پھر قربت میں جو اس سے کم ہے پھر جو اس سے بھی کم ہے۔''
توثیق الحدیث: أخرجہ البخاری (40110)، و مسلم (2548) والروایة الثانیة عند مسلم، والثانیة عند البخاری
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔ ۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔ ۔۔

 

[life]

حدیث نمبر 317
حضرت ابوہریرہ رضی اللہ عنہ سے روایت ہے کہ نبی صلی اللہ علیہ وسلم نے فرمایا: ''ناک خاک آلود ہو۔ پھر ناک خاک آلود ہو۔ پھر ناک خاک آلود ہو (اس شخص کی) جس نے اپنے والدین کو بڑھاپے میں پایا، ان میں سے ایک کو یا دونوں کو اور پھر وہ (ان کی خدمت کر کے) جنت میں نہیں گیا'' (مسلم)
توثیق الحدیث: أخرجہ مسلم (2551)۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔ ۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔ ۔۔

 

[life]

حدیث نمبر 318
حضرت ابو ہریرہ رضی اللہ عنہ ہی سے روایت ہے کہ ایک آدمی نے عرض کیا: "اے اللہ کے رسول! میرے کچھ رشتے دار ہیں، میں ان سے تعلقات جوڑتا ہوں اور وہ مجھ سے قطع تعلق کرتے ہیں، میں ان سے اچھا سلوک کرتا ہوں اور وہ مجھ سے برا سلوک کرتے ہیں، میں ان سے تحمل و بردباری سے پیش آتا ہوں اور وہ میرے ساتھ جہالت سے پیش آتے ہیں۔" آپ نے فرمایا: ''اگر تم ایسے ہی ہو جیسا کہ تم نے کہا ہے تو پھر گویا تم انہیں گرم راکھ کھلا رہے ہو اور ان کے مقابلے میں اللہ تعالیٰ کی طرف سے تمہارے ساتھ ایک مددگار (فرشتہ) رہے گا، جب تک تم ان کے ساتھ یہی سلوک رکھو گے۔'' (مسلم)
توثیق الحدیث:أخرجہ مسلم(2558)
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔ ۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔ ۔۔

 

[life]

حدیث نمبر 319
حضرت انس رضی اللہ عنہ سے روایت ہے کہ رسول اللہ صلی اللہ علیہ وسلم نے فرمایا: ''جس شخص کو پسند ہو کہ اس کے رزق میں فراخی اور اس کی عمر میں تاخیر (دارزی عمر) کی جائے تو اسے چاہیے کہ وہ صلہ رحمی کرے۔'' (متفق علیہ)
توثیق الحدیث:أخرجہ البخاری(41510۔فتح)' ومسلم(2557)
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔ ۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔ ۔۔

 

[life]

حدیث نمبر 320
حضرت انس رضی اللہ عنہ بیان کرتے ہیں کہ انصارِ مدینہ میں سے کھجوروں کے باغات کے لحاظ سے حضرت ابو طلحہ رضی اللہ عنہ سب سے زیادہ مالدار تھے اور انہیں اپنے اموال میں سے بیر حاء نامی باغ سب سے زیادہ محبوب تھا اور یہ مسجد نبوی کے سامنے تھا۔ رسول اللہ صلی اللہ علیہ وسلم اس میں تشریف لے جاتے تھے اور وہاں کا پاکیزہ اور شیریں پانی نوش فرماتے تھے۔ حضرت انس بیان کرتے ہیں کہ جب یہ آیت نازل ہوئی کہ ''تم ہرگز نیکی حاصل نہیں کرسکتے یہاں تک کہ اپنی پسندیدہ چیزیں خرچ کرو۔'' تو ابو طلحہ رسول اللہ صلی اللہ علیہ وسلم کی خدمت میں حاضر ہوئے اور عرض کیا: "اے اللہ کے رسول! اللہ نے آپ پر یہ آیت نازل فرمائی کہ تم ہرگز نیکی حاصل نہیں کر سکتے۔ یہاں تک کہ تم اپنی پسندیدہ چیزیں (اللہ کی راہ میں) خرچ کرو'' اور مجھے اپنے مال میں سے سب سے زیادہ محبوب مال بیر حاء کا باغ ہے۔ لہٰذا یہ اللہ کے لیے صدقہ ہے۔ اور میں اللہ سے اس کے اجر کی اور اس کے ہاں اس ذخیرہ ہونے کی امید رکھتا ہوں۔ پس اے اللہ کے رسول! آپ اللہ کی عطا کردہ راہنمائی کے مطابق اسے جہاں اور جیسے چاہیں استعمال میں لائیں۔" یہ سن کر رسول اللہ صلی اللہ علیہ وسلم نے فرمایا: ''واہ واہ! بہت خوب! یہ مال تو بہت ہی نفع بخش ہے! یہ مال تو بہت ہی نفع بخش ہے۔ تم نے جو کچھ کہا میں نے سن لیا۔ میرا تو خیال یہ ہے کہ تم اسے اپنے قریبی رشتہ داروں میں تقسیم کردو۔'' ابو طلحہ نے عرض کیا: "اے اللہ کے رسول! میں ایسے ہی کروں گا۔" پس حضرت ابو طلحہ نے اسے اپنے رشتہ داروں اور چچازاد بھائیوں میں تقسیم کردیا۔ (متفق علیہ)
توثیق الحدیث کیلئے حدیث نمبر (297) ملاحظہ فرمائیں۔