[life]

میرے گھر میں روشن رکھنا


چینی سی گڑیا سی جب وہ

چھوٹے چھوٹے قدم اٹھاتی

میری جانب آتی ہے تو

اسکے لبوں پر ایک ستارہ کھلتا ہے

" پا پا "


اللہ ۔۔۔۔۔۔۔۔۔۔۔ اس آواز میں کتنی راحت ہے

ننھے ننھے ہاتھ بڑھا کر

جب وہ مجھ کو چھوتی ہے

تو یوں لگتا ہے جیسے

جیسے میری روح کی ساری سچائی

اس کے لمس میں جاگ اٹھی ہے

اے مالک ! اے ارض و سما کو چٹکی میں بھرلینے والے

تیرے سب معمور خزانے

میری ایک طلب

میرا سب کچھ مجھ سے لے لے

لیکن جب تک اس آکاش پہ تارے جلتے بجھتے ہیں

میرے گھر میں روشن رکھنا

یہ معصوم سی ہنسی

اے دنیا کے رب !!

کوئی نہیں ہے اس لمحے تیرے میرے پاس

سچ سچ مجھ سے کہہ

تیرے ان معمور خزانوں کی بےانت گرہ میں

بچے کی معصوم ہنسی سے زیادہ پیاری شئے

کیا کوئی ہے ؟؟؟