[life]

Injila ka khat Abeer k naam



KHULA KHAT.... INJILA KA ABEER K NAAM
------------------------------------------

Kaise ho? Merey baad zindagi main sakoon aa gaya ya abhi tak sakoon k matlaashi ho? Merey wehm-o gumaa.n main bhi nahi tha k kabhi…… kabhi mujhe tum sey koi baat karne k liye iss kaghaz kalam ka sahara lena parey ga….. Tum Abeer, ,,, tum tu meri baatain bin kahe hi samajh jaya kartey thay, magar aaj….. dekh lo.... aaj waqt nay kaisa palta khaya hay.

Tumhain yaad hay aik baar jab hum mohabbat k falsafe per be’hes kar rahey thay tu main nay kaha tha k murd ki mohabbat main bara bachpana hota hay, wo har us khilone ko hasil karne ki taman’na karta hay jo us kI aankhoo.n ko bha jata hay, phir wo zid, zor, zaberdasti sey uss khiloney ko hasil kar leta hay, chand din tu usey apni jaan sey bhi aziz rakhta hay aur phir jab us ka dill uss khilone sey bhar jata hay tu use kahee.n rakh k bhool jata hay…………… tumhain yaad hay Abeer! Tum meri is baat ko sun kar kitna hansey thay aur tum nay meri soch ko bachpana qarar diya tha.

Magar Abeer guzrey chand barsoo.n main meri baatain sach hi tu sabit hoi hain. Tum jise apni zahanat, ilm-o shaoor per naaz aur mujhe tumhaari qabliyat per maan… Tum bhi tu kitaaboo.n k rasiya thay, tumhaari mohabbat main bhi wo hi bachpana tha tum mano ya na mano!!!! Tum nay bhi mujhe waraq waraq parha aur phir shaid shelf main rakhi dosri kitaaboo.n ki tarha mujh sey tumhara dill bhar gaya.. aur tum mujhe bhi shelf main rakh k bhool gay… mujh per dhool jamti chali gai ,,jamti chali gai aur tum mujh sey be-khabar ho gay….. ye dhool merey warq warq ki tehreer ko chaat gai merey rang ura lay gai magar shaid main wo kitaab thi jo tumhain zaabani az-ber ho chuki thi aur tum mazeed mujh sey maghz mari nahi kar saktey thay……

Abeer mohabbat marti tu nahi hay na!!!? Shaid….. shaid humaari mohabbat mar gai thi ya shaid borhi ho gai thi…..

Oh light chali gai………. Tumhain yaad hay Abeer mujhe andheeroo.n sey bohat khouf aata tha aur tum kahtey thay k Injila tum tu Injila ho roshni deney waali, tumhain andheeroo.n ka kya dar?? Magar shaid tum jantey na thay k roshni ko hi tu andheeroo.n ka dar hota hay. Magar aab…….. magar aab meri roh main itni taareeki hay k mujhe kisi cheez sey koi khouf nahi aata… meri siya bakhti nay har cheez ko siyaahi mail kar diya hay.

Dekho Abeer ye mat samajhna k main ye sab kutch tumhain is liye likh rahi hon k tum merey kaase main mohabbat khairaat karo… NAHI katan nahi. Tumhain shaid yaad ho ya na ho, kyu k jab tum mujhe bhoola sakte ho tu mujhe sey mansoob har baat har yaad ko faramosh kar saktey ho.. haan tu main kah rahi thi k shaid tumhain yaad ho k hum kabhi aachey dost bhi thay aur main har baat tum sey share karti thi k aaj kya kia, kya nahi kya, falaa.n nay mujhe ye kaha aur falaa.n nay wo….. tu socha usi puraani dosti k natey apni zaat ki masmaari bhi tum sey share kar loon.

Aur waise bhi Abeer mohabbat ser jhuka k nahi li jaati, mohabbat tu zaat ka maan hoti hay sar utha k li jaati hay,,, haan albat’ta mohabbat deney ki liye sar tasleem-e kham zaror karna hota hay, jo main saari um’r karti rahi……… main nay shaid befaiz mohabbat ki hay ….. magar khair mohabbat main sood-o ziyaa.n thora hi hota hay.

Pata nahi Abeer kal ka soraj meri zindagi main tulu hota hay ya nahi aur agar howa tu pehley ki tarha apni narm-o roshan kirnoo.n ki phuaar karta hay ya apni tamazat sey mujhe jhulsa deta hay.

Tumhai yaad hay Abeer tum mujhe abhi kabhi NORTH STAR kaha karte thay!!! Shaid balke yaqeenan aab tumhare falak pe chand aur taare nay ubhar aay hain, tumhain nai manzil ki janib jana hay aik nay north star k saath….. Magar merey asmaa.n sey tu chand tarey sab hi ghgaib hain…. So soraj ka bhi kya aitabar nikle ya na nikle

Tumhain nai zindagi naya North Star mubarak ho

Sirf Injila

 

[SHAYAN]

Beautifull
T 4 S

 

[life]

thanks shayan...

 

[Abewsha]

Gud
T 4 S