[nazeer1]

ہمارے ایک رشتہ دار مولوی صاحب تھے.. فرمانے لگے کہ ایک دفعہ میں چند لوگوں کے ساتھ کسی ضروری کام سے بازار گیا.. بازار میں ہمیشہ کی طرح رش تھا جس میں عورتوں کی تعداد زیادہ تھی..
میرے ساتھیوں میں سے ایک صاحب بار بار یہی بات کہتے رہے کہ مولوی صاحب دیکھیں بے حیائی اور فحاشی کس قدر بڑھ گئی ہے.. عورتیں کس طرح بن ٹھن کر اور بے پردہ ہوکر بازاروں میں آئی ہوئی ہیں.. اس عورت کو دیکھیں , کیسے مٹک مٹک کر چل رہی ہے.. اس لڑکی کا لباس دیکھیں کتنا نامناسب ہے.. مولوی صاحب نے تنگ آکر کہہ دیا کہ بھائی ! ان سے زیادہ برا کام تو تم خود کررہے ہو جو خود بھی دیکھ رہے ہو اور دوسروں کو بھی دیکھنے کی ترغیب دے رہے ہو.. بھائی اگر کسی کی کوئی کمی نظر بھی آئے تو اللہ نے پردہ پوشی کا حکم دیا ہے..
اس قسم کی صورت حال فیس بک پر بھی دیکھنے کو مل رہی ہے.. اکثر لکھا نظر آتا ہے کہ "فلاں نے بے شرمی کے سارے ریکارڈ توڑ دیے , ویڈیو دیکھیں اور لعنت بھیجیں.. فلاں نے پاکستان کا سر شرم سے جھکا دیا , ویڈیو دیکھیں اور شیئر کریں.. فلاں نے بےغیرتی کی انتہا کردی , ویڈیو دیکھنے کے لیے لائک کریں.."
میرا ان سے کہنا ہے او بھائی ! فلاں نے تو بے شرمی اور بے غیرتی کی انتہا کردی لیکن آپ نے کونسا شرم وحیا کا پاس رکھا ___ آپ کی طرف سے کونسی غیرت مندی کا مظاہرہ کیا گیا.. کسی کے گناہ کو لوگوں میں پھیلانا اور لوگوں کو دیکھنے کی طرف راغب کرنا کونسی نیکی ہے.. اللہ نے تو پردہ پوشی کا حکم دیا ہے لیکن آپ پردہ دری پر تلے ہوئے ہیں.. فرض کریں اس فلاں کو اللہ نے ہدایت دے دی اور اس نے اپنے تمام گناہوں سے توبہ کرلی تو جو آپ نے ساری دنیا میں اس کا ڈھنڈورا پیٹ دیا اس کا کیا بنے گا..
یاد رکھیئے ! غلط کام کرنے والا تو گناہ گار ہے ہی لیکن اس کو دوسروں تک پھیلانے والا اس سے بھی زیادہ گناہ گار ہے.. جتنے لوگ بھی اس کے گناہ کو دیکھیں گے , اس پر بیہودہ تبصرہ کریں گے سب کا گناہ اس کو ملے گا جس نے اس گناہ کو پھیلایا.. جو دوسروں کو کسی غلط کام کی طرف راغب کرتا ہے ان سب کے گناہوں کے برابر گناہ اس کے نامہ اعمال میں لکھا جاتا ہے.. اس لیے مہربانی فرما کر عقل مندی کا مظاہرہ کریں اور اپنے نامہ اعمال کو سیاہ ہونے سے بچائیں.. اس سے بڑی بے وقوفی اور کیا ہوگی کہ گناہ تو دوسرے کریں اور کل کو بھگتا آپ کو پڑے.. چند لائکس اور کمنٹ بٹورنے کے چکر میں آپ کتنے گھاٹے کا سودا کررہے ہیں , اس کا شاید آپ کو اندازہ نہیں ہے

 

[BaabUlIslam]