[life]

منبعِ نور





وہ بے چین آنکھیں
جو حدِ افق تک
سرابوں کو ہیرے سمجھ کر
تپتی ریت کے گرم ذروں کو
پلکوں سے چنتی رہیں۔۔۔۔۔!
وہ دل کو سدا
خشک صحراوں میں
اپنے ہونے کی تصدیق کی جستجو میں
مسلسل بھٹکتا رہا۔۔!
کوئی ہمدم
کوئی چارہ گر
غمگساری کی ٹھنڈی ہوا
پیار کی چھائوں
ابرِکرم کی فقط
ایک بوچھاڑ کی آس میں
مدتوں
اپنی اندھی انا کے اندھیروں میں
ظلمت کدے کے دریچوں سے
اک نور کی ،جھلملاتی کرن کو
ترستا رہا۔۔!
آج
اوجَ یقیں سے
لرزتے ہوئے مہر کی روشنی میں
نہایا ہوا
اپنے اجلے اصولوں کی چادر میں لپٹا ہوا۔۔!
چشمِ بینا میں گہری بصارت کی ضو
نور ہی نور سرتا قدم
رحم ہی رحم
مہر و محبت کی خوشبو لٹاتا ہوا۔۔!
زندگی کے ہر اک بھید سے آشنا
رحمتوں کے خزینوں سے معمور
اوجِ یقیں سے
نہاں خانہ دل میں اترا
تو لرزاں و ترساں
سسکتے ہوئے دل کا ظلمت کدہ
ایک پل کے لیے
منبع نور بن کر
دھڑکنے لگا۔۔۔۔۔۔۔۔۔۔!