[!~*AdOrAbLe*~!]

**Tumhein mujh se mohabbat hai**

mohabbat kii tabiyat mein
ye kaisaa bachapanaa qudarat ne rakkhaa hai

ke jitnii puraanii jitanii bhii mazabuut ho jaaye
ise taaiid-e-taazaa kii zaruurat phir bhii rahatii hai
yaqiin kii aaKhirii had tak dilon mein lah_lahaatii ho
nigaahon se Tapakatii ho lahuu mein jag_magaatii ho
hazaaron tarah se dil_kash hasiin haale banaatii ho
use izhaar ke lafzon kii haajat phir bhii rahtii hai

mohabbat maaNgatii hai yuuN gavaahii apane hone kii
ke jaise tifl-e-saadaa shaam ko ik biij boye
aur shab mein bauraa uThe
zamiin ko khod kar dekhe
ke paudhaa ab kahaaN tak hai

mohabbat kii tabiyat mein ajab takaraar kii Khuu hai
ke ye iqraar ke lafzon ko sunane se nahiin thakatii
bichhaDane kii ghaDii ho yaa koii milane kii sa'at ho
ise bas ek hii dhun hai
kaho mujh se mohabbat hai
kaho mujh se mohabbat hai

kuchh aisii besakuunii hai vafaa kii sar_zamiinon mein
ke jo ahal-e-mohabbat ko sadaa bechain rakhatii hai
ke jaise phuul mein Khsuhbuu ke jaise haath mein taaraa
ke jaise shaam kaa taaraa
mohabbat karane vaalon kii sahar raaton mein rahtii hai
gumanaam ke shaaKhchon mein aashiyaaN bantaa hai ulfat kaa
ye ain visaal mein bhii hijr ke Khadshon mein rahtii hai

mohabbat ke musaafir zindagii jab kaaT chukte hain
thakan kii karachiyaaN chunte vafaa kii ajarakein pahane
samay kii rah_guzar kii aaKhirii sarhad pe rukate hain
to koii Duubatii saaNson kii Dorii thaam ker
dhiire se kahataa hai
ke ye sach hai naa
hamaarii zindagii ik duusare ke naam likhii thii
dhundhalakaa saa jo aaNkhon ke qariib-o-duur phailaa hai
isii kaa naam chaahat hai
tumhein mujh se mohabbat thii
tumhein mujh se mohabbat hai

mohabbat kii tabiyat mein
ye kaisaa bachapanaa qudarat ne rakkhaa hai