[Owi]

-:||:- Mujhay A Zindagi ! Teri Zaroorat Maar Daalay Gi -:||:-

Meray baatin ko zaahir ki himaayat maar daalay gi
Dil-e-berbaad mujh ko to ye wehshat maar daalay gi

Liye phirtay hein haathon mein qaza ka paish-naama jo
Unhein ik roz honay ki nidaamat maar daalay gi

Meri tafseer itni hai main rasmon ka nahi qaail
Mujhay apni hi mitti say baghaawat maar daalay gi

Khafa ho ker zamaanay say kahaan jaaye ga meray dil
Tujhay pur-khaar raahon ki musaafat maar daalay gi

Jala rakhay hein raahon mein diye jo rasm-e-ulfat k
Unhein qaatil hawaaon ki hiqaarat maar daalay gi

Kaha us nay jahaan choro faqat meray hi ho jaao
Tumhein khud-gharz duniya ki rafaaqat maar daalay gi

Thaka daala hai jeevan ko teri maqrooz saanson nay
Mujhay a zindagi ! teri zaroorat maar daalay gi

….. hungaam berpaa hai sawaad-e-zindagaani mein
Ager jee bhi liye kuch din, mohabbat maar daalay gi.

 

---

•||•––––•||•––•Owi•––•||•––––•||•