[white rose]

Kuchh to ehasaas-e-ziyaan thaa pahale
Dil kaa ye haal kahaan thaa pehle

Ab to manzil bhii hai Khud garm-e-safar
Har qadam sang-e-nishaan thaa pehle

Safar-e-shauq ke far_sang na puuchh
Waqt be-qaid-e-makaan thaa pehle

Ye alag baat ki gham raas hai ab
Is main andeshaa-e-jaan thaa pehle

Yuun na ghabaraaye huay phirte the
Dil ajab kunj-e-amaan thaa pehle

Ab bhii tuu paas nahiin hai lekin
Iss qadar duur kahaan thaa pehle

Daire Daale hain bagolon ne jahaan
Uss taraf chashm-e-ravaan thaa pehle

Ab wo dariyaa na bastii na wo log
Kyaa khabar kaun kahaan thaa pehle

Har Kharaabaa ye sadaa detaa hai
Main bhii aabaad makaan thaa pehle

Kyaa se kyaa ho gaii duniyaa pyaare
Tuu wahiin par hai jahaan thaa pehle

Ham ne aabaad kiyaa mulk-e-suKhan
Kaisa sun_saan samaan thaa pehle

Ham ne bakhshii hai khamoshii ko zubaan
dard majabuur-e-fughaan thaa pehle

Ham ne roshan kiyaa maamuur-e-gham
Warnaa har simt dhuaan thaa pehle

Gham ne phir dil ko jagaayaa 'Nasir'
Khaanaa_barbaad kahaan thaa pehle