[SABA134]

Hayaat! tere na’ey taqaaze, hame’n to be’maut maar de’n gay
zara ye qarz e jaha’n chuka le’n, to qarz e hasti utaar de’n gay

milay gi fursat Gham e jaha’n se, to unki zulfe’n sanvaar de’n gay
khiza’n ruto’n se, jo bach rahe’n gay, wo phool ham un pe waar de’n gay

jo waqt e rukhsat, qaraar e jaa’n ki, dua se hamko nawaazte ho’n
qaraar e jaa’n! us dua pe ham be, tumhe dua e qaraar de’n gay

kahi’n hawao’n ka isti’aarah, kahi’n kisi dard ka ishaarah
suna hai wo ruu e fiqr o fan ko, hamare Gham se nikhaar de’n gay

kisi ke guldasta e muhabbat, se bas ye paiGHaam munsalik tha
ye neemwaa, Nargasi shaguufe, saleeka e intezaar de’n gay

ye furqato’n ke azaab mousam, kahi’n tumhe be’yaqee’n na kar de’n
hame'n to jana’n! ye hijr ke din, guzaarne hai’n, guzaar de’n gay

wohi jo tha Harf e ruuh parwar, zara wo irshaad ho mukar’rar!
wohi k ham, dasht e badguma’n me’n, sahifa e aitabaar de’n gay

tamazato’n ya khunak fazao’n pe is ka ilzaam kyu’n lagae.n
zamee’n se rishto’n ko, torr kar khaak, ye shajar barg o bahaar de’n gay

samandaro’n ke, safar se pehle, wo qariya e jaa’n, se ho ke guzre
hawa e shab ko, payaam ham be, baa’naam e shahr e nigaar de’n gay

'saba' ke paikar ko, phr koi, zakham e aarzu se, saja gaya hai
chalo` Ganimat hai, aur kuch din, ye gul fareeb e bahaar de’n gay...!!!!