[Owi]

-:||:- Raat Ki Chaadar Pay Jaisay Teergi Bikhri Hui -:||:-

Raat ki chaadar pay jaisay teergi bikhri hui
Hasraton ki saij per hai zindagi bikhri hui

Chaand k mukhray say aanchal jab hawa sarka gai
Raat bhar phir chaar-soo thi chaandni bikhri hui

Teri baatein or yaadein raat bhar likhta raha
Subha-dam thi kaaghazon pay shaairi bikhri hui

Beher ki moujon mein phir honay lageen sirgoshiyaan
Meray honton per jo dekhi tishnagi bikhri hui

Aks tera aainay mein jhilmilaaya is terhan
Roshni si her taraf hai husn ki bikhri hui

Kon tha jis nay bikhayra in ko bay-derdi k saath
Kon tha jo chun raha tha her kali bikhri hui

Teray haathon mein raha to zindagi mehfooz thi
Ab kahaan lay jaaye ShihaaB zindagi bikhri hui.

 

---

•||•––––•||•––•Owi•––•||•––––•||•