[life]

۱۵؂ کھجور کے درخت دو قسم کے ہیں ایک وہ جن کی جڑ سے ایک ہی تنا نکلتا ہے اور دوسرے وہ جن کی جڑ سے دو یا زیادہ تنے نکلتے ہیں جبکہ ایک ہی پانی سے انہیں سیراب کیا جاتا ہے یہ بو قلمونی اور تنوع کیا اس خیال کی تردید کے لیے کافی نہیں ہے کہ یہ کائنات اتفاقی حادثہ کے طور پر وجود میں آئی ہے اور کسی چلانے والے کے بغیر چل رہی ہے ؟ اس صورت میں یہ گونا گونی‘ یہ رنگا رنگی اور یہ الگ الگ نوعیتیں ہرگز نہیں ہوسکتی تھیں ۔

۱۶؂ ایک ہی پانی سے درختوں کو سیراب کیا جاتا ہے مگر ان کے پھل ذائقہ میں مختلف ہوتے ہیں کوئی میٹھا تو کوئی کھٹا اور کوئی پھیکا تو کوئی کڑوا۔ ہر چیز میں نوعیتوں کا یہ اختلاف دیکھکر شاعر نے بجا طور پر کہا ہے ؂

یہ ذوق اس جہاں کو ہے زیب اختلاف سے

یہ اختلاف انسان کو دعوت فکر دیتا ہے ۔ اگر انسان عقل سے کام لے تو وہ ان حقیقتوں کو پاسکتا ہے جن کو قبول کرنے کی دعوت قرآن دے رہا ہے ۔