[Owi]

-:||:- Koi Taabeer Do Mujh Ko -:||:-

-:||:- Aakhrash Dil Mein Teray Kya Baat Hai Thehri Hui -:||:-

Tousin-e-dil per teri hi zaat hai thehri hui
Zehan mein yaadon ki baraat hai thehri hui

Khush aankhein hein hamaari dasht-e-wehshat meiun mager
Dil mein ab tak piyaar ki bersaat hai thehri hui

Surkh Aankhein, Zerd Chehra Jaan-e-jaaN Kuch To Bata
Aakhrash Dil Mein Teray Kya Baat Hai Thehri Hui

Dil nikal aaya mager mein muntazir hoon khuwaab ka
So meray kamray mein ab tak raat hai thehri hui

Hai taqaaza piyaar ki baazi musalsal khailna
Go bisaat-e-waqt per ab maat hai thehri hui

Teri aankhon mein hai ashkon ka jahaan simta hua
Zair-e-lab bay-chain dil ki baat hai thehri hui

Kya bataaoon zindagi kis mour per lay aai hai
Door tak sehra-e-ghum hai raat hai thehri hui

Meri palkon per nami si dekh ker tu jaan lay
Ye to teray ishq ki soghaat hai thehri hui.

 

---

•||•––––•||•––•Owi•––•||•––––•||•