dukh dard ke maroun se mera zikr na karna
ghar jao to yaroun se mera zikr na karna

woh zabt na kar payeingee aankhoun ke samander
tum raah guzaroun se mera zikr na karna

phooloun ke nasheman main raha houn main sada se
dekho kabhi kharoun se mera zikr na karna

shayad ye andhere hi mujhe raah dikhayein
ab chaand sitaroun se mera zikr na karna

woh meri kahani ko ghalat rang na de_dein
afsana nigaroun se mera zikr na karna

shayad woh mere haal pe be-saakhta ro_dein
is baar baharoun se mera zikr na karna

le jayeinge gahrai main tum ko bhi baha kar
darya ke kinaroun se mera zikr na karna

woh shakhs mile to use har baat batana
tum sirf isharoun se mera zikr na karna