Aap apna ghubaar thay hum to
Yaad thay yaad-gaar thay hum to

Perdagi ! hum say kiun rakha perdah
Teray hi perdah-daar thay hum to

Waqt ki dhoop mein tumhaaray liye
Shajar-e-saaya-daar thay hum to

Urray jaatay hein dhool ki maanind
Aandhiyon per sawaar thay hum to

Hum nay kiun khud pay aitaybaar kiya
Sakht bay-aitaybaar thay hum to

Sherm hai apni baar baari ki
Bay-sabab baar baar thay hum to

Kiun hamein ker diya gaya mujboor
Khud hi bay-ikhtiyaar thay hum to

Tum nay kaisay bhula diya hum ko
Tum say hi musta’aar thay hum to

Khush na aaya hamein jiye jaana
Lamhay lamhay pay baar thay hum to

Se bhi laytay hamaaray taanon ko
Jaan-e-mann jaan-nisaar thay hum to

Khud ko douraan-e-haal mein apnay
Bay-terhan naa-gawaar thay hum to

Hum ko yaaron nay yaad bhi na rakha
John yaaron k yaar thay hum to !