Ye ghum kya dil ki aadat hai ? nahi to !
Kisi say kuch shikaayat hai ? nahi to !

Hai wo ik khuwaab bay-taabeer us ko
Bhula daynay ki niyat hai ? nahi to !

Kisi k bin kisi ki yaad k bin
Jiye jaanay ki himmat hai ? nahi to !

Kisi soorat bhi dil lagta nahi yaan
To kuch din say ye halat hai ? nahi to !

Tujhay jis nay kaheen ka bhi na rakha
Wo aik zaati si wehshat hai ? nahi to !

Teray is haal per hai sab ko hayrat
Tujhay bhi is pay hayrat hai ? nahi to !

Hum-aahangi nahi duniya say teri
Tujhay is per nidaamat hai ? nahi to !

Hua jo kuch yehi muqsoom tha kya ?
Yehi saari hikaayat hai ? nahi to !

Aziyat-naak ummeedon say tujh ko
Amaan paanay ki hasrat hai ? nahi to !

Tu rehta hai khayaal-o-khuwaab mein gum
To is ki wajha-e-fursat hai ? nahi to !

Wahaan waalon say hai itni mohabbat
Yahaan waalon say nafrat hai ? nahi to !

Sabab jo is judaai ka bana hai
Wo mujh say khoobsoorat hai ? nahi to !