nazar fareb-e-qazaa khaa gayii to kyaa hogaa
hayaat maut se Takraa gayii to kyaa hogaa

naii sahar ke bohat log muntazir haiN magar
naii sahar bhii kajlaa gayii to kyaa hogaa

Gham-e-hayaat se beshak hai Khudkushii aasaan
magar jo maut bhii sharmaa gayii to kyaa hogaa

shabaab-e-laala-o-gul ko pukaarne vaalo
khizaaN sarasht-e-bahaar aa gayii to kyaa hogaa

khushii chhinii hai to Gham kaa hii etmaad na kar
jo ruuH gham se bhii uktaa gayii to kyaa hogaa..