Hamaaray kaar say bay-kaar ho gaya to phir ?
Ye khuwaab, khuwaab ka israar ho gaya to phir ?

Milaa k khaak mein wo sochta reaha berson
Main aainay mein namoo-daar ho gaya to phir ?

Rukaawatein meray honay ka istay-aarah hai
Ye raasta kaheen humwaar ho gaya to phir ?

Wo maahtaab hai, main jheel or safar derpaish
Wo mujh say hota hua paar ho gaya to phir ?

Wo hum-safer jo kisi or ki amaanat hai
Meray galay ka ager haar ho gaya to phir ?

Bas aik khouf say main us say door rehta hoon
Wo doston mein wuzaydaar ho gaya to phir ?

Tamaam sheher nay louta diya hai khaali haath
Or us k derr say bhi inkaar ho gaya to phir ?

Abhi say raasta tabdeel ker liya jaaye
Kaheen jo mujh say tumhein piyaar ho gaya to phir ?