MeraForum Community.No 1 Pakistani Forum Community - یا الٰہی روز و شب توفیقِ احساں دے مجھ

یا الٰہی روز و شب توفیقِ احساں دے مجھے
خوف اپنا ظاہر و باطن میں یکساں دے مجھے

حسبِ سنت یا الہٰی عشقِ قرآں دے مجھے
نعمتِ دارین یعنی نور ایماں دے مجھے

میں نہیں کہتا کہ تو تختِ سلیماں ؑ دے مجھے
اپنی الفت دے مجھے، بس عزم و ایقاں دے مجھے

تادمِ آخر رہوں اسلام پر ثابت قدم
استقامت پختگی ہر لمحہ ہر آں دے مجھے

عزم دے ایسا پہاڑوں سے بھی جا ٹکراؤں میں
قوتِ حیدر رض دے مجھ کو جذبِ سلیماں دے مجھے

مشعلِ راہِ ہدایت اسوہء فاروق رض ہو
عشقِ نبیﷺ ، جذبہء صدیق رض و عثماں رض دے مجھے

راہِ خدمت میں ہی مر مٹنے کی ہے بس آرزو
اے مرے اللہ! تو اسباب و ساماں دے مجھے

تجھ کو پاکر اے خدا پاؤں حیاتِ جاوداں
جو خزاں نا آشنا ہو وہ گلستاں دے مجھے

بحرِ ظلمت میں بنے میرے لئے جو خضرِ راہ
غیب سے کوئی مردِ مسلماں دے مجھے

قلب دے ایسا جو تیری یاد میں پگھل جائے
خوف سے اپنے الہٰی چشمِ گریاں دے مجھے

کر مجھے یارب غنائے ظاہر و باطن عطا
تندرستی اے طبیب درد مندا دے مجھے

اہل بدعت اور بدکاروں کی صحبت سے بچا
یا الہٰی الفت پرہیز گاراں دے مجھے

کام میرا زندگی بھر خدمت قرآن ہو
فہمِ قرآں دے خدایا! نورِ عرفاں دے مجھے

راز و احقر کو عطا کر اے خدا اپنی رضا!
استقامت تادم آخر اے رحماں دے مجھے۔۔