MeraForum Community.No 1 Pakistani Forum Community

Dil pe karte hain dimagon pe asar karte hain
ham ajab log hain zehnon main safar karte hain

jab sarape pe kahin us ke nazar karte hain
mir sahab ki tarah umr basar karte hain

bandishen ham ko kisi hal gavara hi nahin
ham to vo log hain divar ko dar karte hain

vaqt ki tez-kharami hamain kya rokegi
janbish-e-kalk se sadiyon ka safar karte hain

naqsh-e-pa apana kahin rah main hota hi nahin
sar se karte hain mohim jab koi sar karte hain

ham-nashin khub hai ye mahafil-e-yaran ke yahan
vo saliqa hai ke aibon ko hunar karte hain

kya kahen hal tera ai mutamaddin duniya
janvar bhi nahin karte jo bashar karte hain

ham ko dushman ki bhi taqlif gavara na hui
log ehbab se bhi sarf-e-nazar karte hain

marqadon pe to charagan hai shab-o-roz magar
umr kuchh log andheron main basar karte hain

tazakara mir ka Galib ki zaban tak aya
aitaraf-e-hunar, arbab-e-hunar karte hain