Ana Peh Ch'oat Parey Bhi Toa Kaun Dekhta Hay
Duwaan Sa Dil Say Uthey Bhi Toa Kaun Dekhta Hay


Meray Leye Kabi Matti Pay Sardion Ki Hawa
Tumhara Naam Likhay Bhi Toa Kaun Dekhta Hay


Ujaar Ghar Kay Kisi Be-sad'aa Darechay Mein
Koi Chiragh Jalay Bhi Toa Kaun Dekhta Hay


Hajoom-e-Shaher Say hatt kar, Hadood-e-Shaher Kay Baad
Woh Muskara Kar Milay Bhi Toa Kaun Dekhta Hay


Jis Aankh Mein Koi Chehra Na Koi Aks-e-Talab
Woh Aankh Jal Kay Bujey Bhi Toa Kaun Dekhta Hay


Hajoom-e-Dard Mein Kia Muskurai'yee Kay Yahan
Khizaan Mein Phool Khilay Bhi Toa Kaun Dekhta Hay


Milay Baghair Jo Mujse Bichar Gaya Mohsin
Woh Raastay Mein Rukey Bhi Toa Kaun Dekhta Hay