Zameen-o-aasmaan hai or main hoon
Koi wehm-o-gumaan hai or main hoon

Ghumon ka bojh had say berh raha hai
Wafa ka imtayhaan hai or main hoon

Bhanwar mein doob jaaye ga safeena
Shikasta baad-baan hai or main hoon

Mujhay aankhon ki tughyaani ka darr hai
Ye behr-e-bay-karaan hai or main hoon

Meri himmat shikasta ho na jaaye
Mukhaalif ik jahaan hai or main hoon

Main aisay band kamray mein hoon ShihaaB
Jahaan aah-o-fughaan hai or main hoon.