-:||:- Kaho To Jaan Dayta Hoon -:||:-


Tumhein kaisay bataaoon main !

Meray dil per likhi hui tum hi taqdeer ho jaana
Meray saaray hi khuwaabon ki tum hi taabeer ho jaana
Meri is zindigaani ki tum hi jaageer ho jaana

Tumhein kaisay bataaoon main !

Main kiun naa-shaad rehta hoon
Main kiun berbaad rehta hoon
Ye jo ik faasla aata hai hum mein waqt k baa’iss
Bas is hi faaslay per jaan
Main khud per jaber kerta hoon
Gila shikwa nahi kerta
Musalsal saber kerta hoon

Tumhein kaisay bataaoon main !

K jab main saber kerta hoon
Zameen-e-maslihat mein aarzoo ko dafan kerta hoon
Falak say toot ker jaisay samander mein bikherta hoon
Main kaisay saber kerta hoon main kaisay jaber kerta hoon

Suno !
In chaahaton ko ishq ki pehchaan dayta hoon
Junoon ki aakhri had ka koi unwaan dayta hoon

Suno !
Main tum ko maan dayta hoon
Yaqeen tum ko dilaanay ko
Kaho to jaan dayta hoon !