MeraForum Community.No 1 Pakistani Forum Community

اَماوَس

مجھ سے باہر مِلو
مجھ سے باہر رہو
مجھ کو دیکھو مگر
دُور سے دیکھنا
میری آنکھوں میں محرومیوں کے بھنور
میری پلکوں پہ صدیوں کی گردِ سَفر
میرا چہرہ ہوَس کے پسینے میں تَر
اِتنے نزدیک سے دِل میں مَت گھولنا
میرے ہونٹوں پہ چَسپاں سیاہ آئینے
آئینے میں جنھیں
ٹوٹنا بھی تو ہے
ہاتھ میں ہاتھ دیتے ہوئے سوچنا
سوچنا ایک دن ایک دن بھی نہیں
ایک پَل اِک گھڑی
ہاتھ کو ہاتھ سے چھوُٹنا بھی تو ہے
مجھ سے باہر مِلو
مجھ سے باہر رہو
میرا جَلتا بدن اِک اَلاؤ کی صُورت ہے روشن سدا
اِک اَلاؤ کہ جس میں پگھلتی رہیں
وقت کی ہڈّیاں
خواہشوں کے کفن
میرا جلتا بدن
جس کا ایندھن بنے
بے جنازہ سخن
دیکھنا چھو نہ جائے کہیں بے سبب
موُم کی شاخ سے آگ کا پیرہن
مجھ سے باہر مِلو
مجھ سے باہر رہو
دیکھنا میرے اندر اُترنا عَبث
میرے اندر کی بستی میں چاروں طرف
ایک ’’ ویران ڈر ‘‘ کب سے آباد ہے
جس کے سائے میں سہمے ہوُئے بام و دَر
بے صدا وادیوں جیسے گُم صُم فضا
جس کے سینے میں
اِک عُمر کے وسَوسے
پتھروں کی طرح سر اُٹھائے ہوُئے
ناچتے ہیں برہنہ بدن کف بہ لَب
دیکھنا میرے اندر اُترنے کی دُھن
تم کو پتھر نہ کر دے بہت دیکھنا
میرے اندر اداسی کی رُت دیکھنا
مجھ سے باہر مِلو
مجھ سے باہر رہو
میرے اندر اندھیروں کی برسات ہے
میرے اندر ’’ اَماوَس بھری ‘‘ رات ہے
مجھ سے باہر مِلو
مجھ سے باہر رہو

Mohsin Naqvi