MeraForum Community.No 1 Pakistani Forum Community - ab to khuvahish hai k yeh zakham b kha kar dekhain ~ Mohsin Naqvi

ab to khuvahish hai k yeh zakham b kha kar dekhain
lamha bhar ko hi sahi usko bhula kar dekhain

shehar mein jashan e shab e qadar ki sa'aat ayee
aaj hum b terey milney ki dua kar dekhain

aandhiyun se jo ulajhney ki kasak rakhtey hain
ik dia tez hava mein b jala kar dekhain

kuch to avara havaon ki thakan khatam karain
apney qadmon k nishaan aap mita kar dekhain

zindagi ab tujhey sochain b to dum ghut'taa hai
hum ne chaha tha, kabi tuj se vafa kar dekhain

jin k zarron mein khizaan haanp k so jati hai
aisi qabron pe koi phool saja kar dekhain

dekhna ho to mohabbat k azza'daaron ko
nashanasayee ki diivaar gira kar dekhain

yun b dunya humain maqrooz kiye rakhti hai
dast e qaatil tera ehsaan b utha kar dekhain

roney valon k to humdard bohat hain Mohsin
hanstey hanstey kabi dunya ko rula kar dekhain