-:||:- HumsafaR -:||:-

Tumhaara naam kuch aisay meray honton pay khilta hai
Andhayri raat mein jaisay
Achaanak chaand baadal k kisi konay say baahir jhaankta hai
Or saaray manzaron mein roshni si phail jaati hai
Kali jaisay, larazti ous k qatray pehan ker muskuraati hai
Badalti rutt, kisi maanoos si aahat ki daali lay k chalti hai
To khushboo baagh ki deewaar say rokay nahi rukti
Isi khushboo k dhaagay say mera her chaak silta hai
Tumhaaray naam ka taara meri saanson mein khilta hai
Kisi uljhi hui gum-naam si chinta k jaadoo mein
Kisi sochay huway bay-naam say lamhay ki khushboo mein
Kisi mosam k daaman mein, kisi khuwaahish k pehloo mein
To is khush-rung manzar mein tumhaari yaad ka rasta
Na-jaanay kis taraf say photo’ta hai
Or phir aisay meri her raah k humraah chalta hai
K aankhon mein sitaaron ki guzer gaahein si banti hein
Dhanak ki kehkashaayein si
Tumhaaray naam k in khush-numaa hurfon mein dhalti hein
K jin k lums say honton pay jugnoo raqs kertay hein
Tumhaaray khuwaab ka rishta meri neendon say milta hai
To dil aabaad hota hai
Mera her chaak silta hai
Tumhaaray naam ka taara meri raaton mein khilta hai.