Jab samander mujhay saahil pay kaheen paata hai
Pair choonay k liye doura chala aata hai

Jab musaafir koi sehra mein bhatak jaata hai
Raasta ik nai manzil ka nikal aata hai

Roz kirnein meray kamray mein chali aati hein
Roz sooraj koi payghaam nayaa laata hai

Jis nay rakha hai sukhi jagg mein hamayshah mujh ko
Aik Allah hai or dooji meri maata hai

Us ki aankhon mein mujhay dekh k jo aata hai .....
Meri aankhon ko wohi rung bohat bhaata hai