be-chain bohat phirna ghabraye hue rehna

ik aag see jazbon mei dehkaaye hue rehna

chhalkaye hue chalna khushbu lab-e-la.alein ki

ik baagh sa sath apney mehkaye hue rehna

us husn ka sheiwa hai jab ishq nazar aye

perdey mei chaley jana sharmaye hue rehna

ik shaam see kar rakhna kaajal k karishmey se

ik chand sa ankho mei chamkaye hue rehna

adat he bana li hai tumne to aqeel apni

jis sheher mei bhi rehna uktaye hue rehna