dil ke sun_saan jaziiron ki Khabar layega
dard pahlu se judaa ho k kahaan jayega

kaun hotaa hai kisii ka shab-e-tanha_ii mein
Ghum-e-furqat hi Ghum-e-ishq ko behalayega

chaand k pehlu mein dam saadh k roti hai kiran
aaj taaron ka fusuun Khaak nazar aayega

raakh mein aag dabii hai Ghum-e-mehrumii ki
raakh ho kar bhi ye shola hamein sulgayega

waqt Khaamosh hai ruuthay huwaye yaaron ki tarah
kaun lau detay huwaye zakhmon ko sehalayega

dhuup ko dekh k uss jism pe parti hai jhamak
chhaon dekheingay toh uss zulf ka dhiyaan aayega

zindagi chal k zaraa maut ka dam_Kham dekhein
warna yeh jazbaa lehad tak hamein le jayega