Kahta hai mujhe usne bhulaya bhi nahiN hai
Milne ko kabhi mujh se woh aaya bhi nahiN hai


nazroN se mujhe usne giraya bhi nahiN hai
seene se mujhe apne lagaya bhi nahiN hai


royeN haiN magar aise keh aaNkheN nah huweeN num
aur ashkoN se daman ko bhigoya bhi nahiN hai


main kaise safar meN hooN mira Haal nah poochho
ab sir pe mire dhoop bhi saya bhi nahiN hai


betab hai woh qissa sunane ko usey dil
jo Khud ko abhi humne sunaya bhi nahiN hai


ik naqsh hai dil men jo kureda nahiN ab tak
aur jisko kabhi hum ne miTaaya bhi nahiN hai


hum naam uska kabhi lub pe nah laaye
aur dil se kabhi usko bhulaaya bhi nahiN hai