View Full Version : تواضع اور مومنوں سے نرمی کے ساتھ پیش آنا
ریاض الصالحین باب 79تا 71
باب 71
تواضع اور مومنوں سے نرمی کے ساتھ پیش آنا
اللہ تعالیٰ نے فرمایا: ''جو مومن تمہارے پیروکار ہیں ان کے ساتھ نرمی سے پیش آؤ۔'' (سورة الشعراء:215)
اور فرمایا: ''اے ایمان والو! جو تم میں سے اپنے دین سے پھر جائے تو عنقریب اللہ تعالیٰ ایسے لوگ پیدا فرما دے گا جن سے اللہ تعالیٰ محبت کرے گا اور وہ اللہ تعالیٰ سے محبت کریں گے۔ وہ مومنوں کے لیے نرم اور کافروں کے لیے سخت ہوں گے۔'' (سورة المائدة:54)
نیز فرمایا: ''اے لوگو! ہم نے تمہیں ایک مرد ایک عورت سے پیدا کیا اور تمہیں خاندانوں اور قبیلوں میں تقسیم کردیا تاکہ تم ایک دوسرے کو پہچان سکو، بے شک اللہ تعالیٰ کے ہاں تم میں سب سے زیادہ عزت والا وہ ہے جو تم میں سب سے زیادہ متقی (یعنی اللہ تعالیٰ سے ڈرنے والا) ہے۔'' (سورة الحجرات :13)
اور فرمایا: ''تم اپنے آپ کو پاک مت کہو وہ تم میں سے تقویٰ والوں کو خوب جانتا ہے۔''
(سورةالنجم:32)
اور فرمایا: "اعراف والے کچھ لوگوں کو پکاریں گے جن کو وہ ان کی علامت سے پہچانتے ہوں گے۔ (کہ) "تم کو تمہارا جتھا اور تمہارا اپنے کو بڑا سمجھنا کچھ کام نہ آیا۔ کیا یہ وہی لوگ ہیں جن کی بابت تم قسمیں کھایا کرتے تھے کہ ان کو اللہ تعالیٰ کی رحمت حاصل نہیں ہوگی؟" (ان اہل ایمان کو حکم ہوگا۔) جنت میں داخل ہوجاؤ۔ تم پر کوئی خوف ہوگا نہ تم غمگین ہوگے۔'' (سورة الأعراف: 48۔49)۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔ ۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔ ۔۔
حدیث نمبر 602
حضرت عیاض بن حِمار رضی اللہ عنہ بیان کرتے ہیں کہ رسول اللہ صلی اللہ علیہ وسلم نے فرمایا: ''بلا شبہ اللہ تعالیٰ نے میری طرف وحی بھیجی ہے کہ تم آپس میں تواضع اختیار کرو حتیٰ کہ کوئی کسی پر فخر نہ کرے اور نہ کوئی کسی پر زیادتی کرے۔'' (مسلم)
توثیق الحدیث: أخرجہ مسلم (2865)(64)
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔ ۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔ ۔۔
حدیث نمبر 603
حضرت ابوہریرہ رضی اللہ عنہ سے روایت ہے کہ رسول اللہ صلی اللہ علیہ وسلم نے فرمایا: ''صدقہ مال میں کوئی کمی نہیں کرتا اور عفو و درگزر سے اللہ تعالیٰ بندے کی عزت میں اضافہ کرتا ہے اور جو شخص اللہ تعالیٰ کے لیے تواضع اختیار کرتا ہے تو اللہ تعالیٰ اسے رفعت و بلندی عطا فرماتا ہے۔'' (مسلم)
توثیق الحدیث کے لیے حدیث نمبر (556) ملاحظہ فرمائیں۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔ ۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔ ۔۔
حدیث نمبر 604
حضرت انس رضی اللہ عنہ بیان کرتے ہیں کہ وہ بچوں کے پاس سے گزرے تو انہیں سلام کیا اور فرمایا: ''نبی صلی اللہ علیہ وسلم ایسے ہی کیا کرتے تھے۔" (متفق علیہ)
توثیق الحدیث: أخرجہ البخاری (3211۔فتح)، و مسلم (2168)(15)
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔ ۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔ ۔۔
حدیث نمبر 605
حضرت انس رضی اللہ عنہ ہی بیان کرتے ہیں کہ مدینے کی باندیوں میں سے کوئی باندی نبی صلی اللہ علیہ وسلم کو ان کے دست مبارک سے پکڑتی اور (کسی کام میں مدد کے لیے) آپ کو جہاں چاہتی لے جاتی۔'' (بخاری)
توثیق الحدیث: أخرجہ البخاری (48910۔فتح)، معلقاً، و وصلہ أبو داود (4818)، و أحمد (3 119 و 214) من طریق حمید الطویل عن أنس۔ و وصلہ مسلم (2326) من طریق ثابت عن أنس۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔ ۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔ ۔۔
حدیث نمبر 606
حضرت اسود بن یزید رضی اللہ عنہ بیان کرتے ہیں کہ حضرت عائشہ رضی اللہ عنہا سے دریافت کیا گیا کہ نبی صلی اللہ علیہ وسلم اپنے گھر میں کیا کام کیا کرتے تھے؟ انہوں نے فرمایا: ''آپ اپنے اہل خانہ کی خدمت میں لگے رہتے تھے پس جب نماز کا وقت ہوتا تو آپ نماز کے لیے تشریف لے جاتے۔" (بخاری)
توثیق الحدیث: أخرجہ البخاری (1622۔فتح)
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔ ۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔ ۔۔
حدیث نمبر 607
حضرت ابو رفاعہ تمیم بن اسید رضی اللہ عنہ بیان کرتے ہیں کہ میں نبی صلی اللہ علیہ وسلم کی خدمت میں حاضر ہوا۔ آپ اس وقت خطبہ ارشاد فرما رہے تھے۔ میں نے عرض کیا: "اے اللہ کے رسول! ایک اجنبی آدمی آیا ہے وہ اپنے دین کے بارے میں پوچھتا ہے اور اسے یہ معلوم نہیں کہ اس کا دین کیا ہے؟" پس رسول اللہ صلی اللہ علیہ وسلم میری طرف متوجہ ہوئے اور خطبہ چھوڑ دیا حتیٰ کہ آپ میرے قریب تشریف لے آئے۔ آپ کے لیے ایک کرسی لائی گئی تو آپ اس پر بیٹھ گئے اور اللہ تعالیٰ نے جو تعلیم آپ کو دی تھی وہ تعلیم آپ مجھے دینے لگے پھر اپنے خطبے کی طرف گئے اور اس کے آخری حصے کو مکمل فرمایا'' (مسلم)
توثیق الحدیث: أخرجہ مسلم (876)
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔ ۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔ ۔۔
حدیث نمبر 608
حضرت انس رضی اللہ عنہ سے روایت ہے کہ رسول اللہ صلی اللہ علیہ وسلم جب کھانا تناول فرماتے تو اپنی تین انگلیاں چاٹ لیتے (کیونکہ آپ تین انگلیوں سے کھانا تناول فرماتے تھے) راوی بیان کرتے ہیں کہ آپ نے فرمایا: ''جب تم میں سے کسی کا لقمہ گرجائے تو وہ اس سے مٹی وغیرہ کو دور کردے اور اسے کھالے اور اسے شیطان کے لیے نہ چھوڑے۔'' (اور آپ نے حکم فرمایا کہ پیالے اور پلیٹ وغیرہ کو پونچھ کر صاف کیا جائے اور فرمایا (یہ اس لیے کہ) تم نہیں جانتے کہ تمہارے کھانے کے کون سے حصے میں برکت ہے۔'' (مسلم)
توثیق الحدیث: أخرجہ مسلم (4 203)
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔ ۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔ ۔۔
حدیث نمبر 609
حضرت ابوہریرہ رضی اللہ عنہ سے روایت ہے کہ نبی صلی اللہ علیہ وسلم نے فرمایا: ''اللہ تعالیٰ نے جتنے بھی انبیاء معبوث فرمائے ان سب نے بکریاں چرائیں۔ آپ کے صحابہ نے عرض کیا: اے اللہ کے رسول! آپ نے بھی؟ آپ نے فرمایا: ''ہاں! میں مکہ والوں کی بکریاں چند قیراط کے عوض چرایا کرتا تھا۔ (بخاری)
توثیق الحدیث کے لیے حدیث نمبر (600) ملاحظہ فرمائیں۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔ ۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔ ۔۔
حدیث نمبر 610
حضرت ابو ہریرہ رضی اللہ عنہ ہی سے روایت ہے کہ نبی صلی اللہ علیہ وسلم نے فرمایا: ''اگر مجھے بکری یا گائے کے پائے یا دستی کی (بھی) دعوت دی جائے تو میں ضرور قبول کروں گا اور اگر پائے یا دستی کا مجھے ہدیہ دیا جائے تو میں اسے بھی ضرور قبول کروں گا۔'' (بخاری)
توثیق الحدیث: أخرجہ البخاری (5 199۔فتح)
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔ ۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔ ۔۔
حدیث نمبر 611
حضرت انس رضی اللہ عنہ بیان کرتے ہیں کہ رسول اللہ صلی اللہ علیہ وسلم کی ''عضباء ''نامی اونٹنی تھی جس سے کوئی اونٹ آگے بڑھ سکتا تھا (یا یہ ممکن نہیں تھا کہ کوئی اونٹ اس سے آگے بڑھ جائے)۔ پس (ایک دفعہ) ایک دیہاتی اپنے اونٹ پر آیا اور اس کے آگے نکل گیا تو مسلمانوں پر یہ چیز نہایت گراں گزری حتیٰ کہ نبی صلی اللہ علیہ وسلم نے بھی اسے پہچان لیا تو آپ نے فرمایا: ''اللہ تعالیٰ پر یہ حق ہے کہ دنیا میں جو چیز بھی بلند ہو تو وہ اسے پست کردے۔''
(بخاری)
توثیق الحدیث: أخرجہ البخاری (736۔فتح)
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔ ۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔ ۔۔
باب 72
تکبر اورخود پسندی حرام ہے
اللہ تعالیٰ نے فرمایا: ''یہ آخرت کا گھر ہم انہی لوگوں کے لیے خاص کرتے ہیں جو دنیا میں بڑائی و بلندی چاہتے ہیں نہ فساد اور اچھا انجام متقی لوگوں کے لیے ہے۔'' (سورةالقصص:83)
اور فرمایا: ''زمین پر اکڑ کر نہ چل۔'' (سورة الٍاسراء:37)
نیز فرمایا: ''تو اَزراہ تکبر اپنا چہرہ لوگوں سے مت پھیر اور زمین پر اِترا کر بھی نہ چل بے شک اللہ تعالیٰ ہر تکبر کرنے والے اور فخر کرنے والے کو پسند نہیں کرتا'' (سورة لقمان:18)
اللہ تعالیٰ نے فرمایا: ''قارون (سیدنا) موسیٰ کی قوم سے تھا پس اس نے ان پر سرکشی کی اور ہم نے اسے اتنے خزانے دیے کہ ان کی کنجیاں ایک طاقت ور جماعت بمشکل اٹھاتی تھی۔ جب اس سے اس کی قوم نے کہا "اِترا مت! یقیناً اللہ تعالیٰ اِترانے والوں کو پسند نہیں فرماتا'' (اللہ تعالیٰ کے اس فرمان تک) ''پس ہم نے اس کو اور اس کے گھر کو زمین میں دھنسا دیا۔'' (سورة القصص:76)
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔ ۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔ ۔۔
حدیث نمبر 612
حضرت عبداللہ بن مسعود رضی اللہ عنہ سے روایت ہے کہ نبی صلی اللہ علیہ وسلم نے فرمایا: ''وہ شخص جنت میں نہیں جائے گا جس کے دل میں ذرہ برابر تکبر ہوگا۔'' ایک آدمی نے کہا: آدمی یہ پسند کرتا ہے کہ اس کا لباس اچھا ہو اور اس کے جوتے اچھے ہوں (تو کیا یہ بھی تکبیر ہے)؟ آپ نے فرمایا: ''بلا شبہ اللہ تعالیٰ جمیل ہے اور وہ جمال کو پسند فرماتا ہے، تکبر تو حق کا انکار کرنا اور لوگوں کو حقیر سمجھنا ہے۔'' (مسلم)
توثیق الحدیث: أخرجہ مسلم (91)
حدیث نمبر 613
حضرت سلمہ بن اکوع رضی اللہ عنہ سے روایت ہے کہ ایک آدمی نے رسول اللہ صلی اللہ علیہ وسلم کی موجودگی میں بائیں ہاتھ سے کھانا کھایا تو آپ نے فرمایا: ''دائیں ہاتھ سے کھاؤ۔'' اس نے کہا: میں اس کی استطاعت نہیں رکھتا۔ آپ نے فرمایا: ''تو نہ ہی طاقت رکھے۔'' صرف کبر نے اُسے آپ کی بات ماننے سے روکا۔ راوی بیان کرتے ہیں کہ پھر وہ اس دائیں ہاتھ کو اپنے منہ تک بھی نہ اٹھا سکا۔ (مسلم)
توثیق الحدیث کے لیے حدیث نمبر (159) ملاحظہ فرمائیں۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔ ۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔ ۔۔
حدیث نمبر 614
حضرت حارثہ بن وہب رضی اللہ عنہ بیان کرتے ہیں کہ میں نے رسول اللہ صلی اللہ علیہ وسلم کو فرماتے ہوئے سنا: ''کیا میں تمہیں جہنمیوں کے بارے میں نہ بتاؤں؟ ہر سرکش، بخیل اور متکبر (جہنمی ہے)۔'' (متفق علیہ)
توثیق الحدیث کے لیے حدیث نمبر (252) ملاحظہ فرمائیں ۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔ ۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔ ۔۔
حدیث نمبر 615
حضرت ابو سعید خدری رضی اللہ عنہ سے روایت ہے کہ نبی صلی اللہ علیہ وسلم نے فرمایا: ''جنت اور دوزخ نے آپس میں جھگڑا کیا تو دوزخ نے کہا: "میرے اندر بڑے سرکش اور متکبر لوگ ہوں گے۔" اور جنت نے کہا: "میرے اندر کمزور اور مسکین قسم کے لوگ ہوں گے۔" پس اللہ تعالیٰ نے ان دونوں کے درمیان فیصلہ فرمادیا (فرمایا) ''اے جنت! تو میری رحمت ہے میں تیرے ذریعے سے جس پر چاہوں گا رحم کروں گا اور اے آگ، تو میرا عذاب ہے میں تیرے ذریعے سے جس کو چاہوں گا عذاب دوں گا۔ اور تم دونوں کو بھرنا میرے ذمے ہے۔'' (مسلم)
توثیق الحدیث کے لیے حدیث نمبر (254) ملاحظہ فرمائیں۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔ ۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔ ۔۔
حدیث نمبر 616
حضرت ابو ہریرہ رضی اللہ عنہ سے روایت ہے کہ رسول اللہ صلی اللہ علیہ وسلم نے فرمایا: ''اللہ تعالیٰ قیامت والے دن ایسے شخص کو (نظر رحمت سے) نہیں دیکھے گا جو اپنا ازار ازراہ تکبر ٹخنوں سے نیچے گھسیٹتا ہوا چلے۔'' (متفق علیہ)
توثیق الحدیث: أخرجہ البخاری (25710۔فتح)، و مسلم(2087)
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔ ۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔ ۔۔
حدیث نمبر 617
حضرت ابوہریرہ رضی اللہ عنہ ہی بیان کرتے ہیں کہ رسول اللہ صلی اللہ علیہ وسلم نے فرمایا: ''تین قسم کے آدمیوں سے اللہ تعالیٰ روز قیامت کلام فرمائے گا نہ انہیں پاک کرے گا اور نہ ہی (نظر رحمت سے) ان کی طرف دیکھے گا اور ان کے لیے دردناک عذاب ہو گا :(1)بوڑھا زانی (2)جھوٹا بادشاہ (3) اور متکبر فقیر۔'' (مسلم)
توثیق الحدیث: أخرجہ مسلم (107)
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔ ۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔ ۔۔
حدیث نمبر 618
حضرت ابوہریرہ رضی اللہ عنہ ہی بیان کرتے ہیں کہ رسول اللہ صلی اللہ علیہ وسلم نے فرمایا: ''اللہ عزوجل فرماتا ہے: "عزت میری ازار اور بڑائی میری چادر ہے، پس جو شخص ان میں سے کوئی چیز مجھ سے کھینچے گا تو میں اسے عذاب دوں گا۔''
(مسلم)
توثیق الحدیث: أخرجہ مسلم (2620)
حدیث نمبر 619
حضرت ابوہریرہ رضی اللہ عنہ ہی سے روایت ہے کہ رسول اللہ صلی اللہ علیہ وسلم نے فرمایا: ''ایک دفعہ ایک آدمی ایک حلہ (سوٹ، جو ڑا) پہنے ہوئے جارہا تھا اس کے نفس نے اسے خود پسندی میں مبتلا کیا ہوا تھا۔ اس نے بالوں میں کنگھی کی ہوئی تھی اور وہ اپنی چال میں اتراتا ہوا جارہا تھا۔ پس اللہ تعالیٰ نے اسے زمین میں دھنسا دیا، اب وہ روز قیامت تک زمین میں دھنستا جائیگا۔ (متفق علیہ)
توثیق الحدیث: أخرجہ البخاری (25810۔فتح)، و مسلم (2088)
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔ ۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔ ۔۔
حدیث نمبر 620
حضرت سلمہ بن اکوع رضی اللہ عنہ بیان کرتے ہیں کہ رسول اللہ صلی اللہ علیہ وسلم نے فرمایا: ''آدمی تکبر کا اظہار کرتا ہے حتیٰ کہ وہ متکبرین میں لکھ دیا جاتا ہے پھر اسے وہی سزا ہوگی جو ان (سرکش) لوگوں کو ہوگی۔'' (ترمذی۔ حدیث حسن ہے)
توثیق الحدیث: ضعیف۔ أخرجہ الترمذی (2000)
یہ حدیث عمر بن راشد یمامی کے ضعف کی وجہ سے ضعیف ہے۔
۔۔۔۔۔۔۔۔۔۔۔۔۔۔۔۔۔۔ ۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔ ۔۔
باب 73
حسن اخلاق
اللہ تعالیٰ نے فرمایا: ''بلا شبہ آپ (صلی اللہ علیہ وسلم) خُلُقِ عظیم پر فائز ہیں۔'' ( سورۃ ن:4 )
اور فرمایا: ''غصہ پی جانے والے اور لوگوں کو معاف کردینے والے۔'' (سورة آل عمران: 134)
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔ ۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔ ۔۔
حدیث نمبر 621
حضرت انس رضی اللہ عنہ بیان کرتے ہیں کہ رسول اللہ صلی اللہ علیہ وسلم تمام لوگوں میں سے سب سے اچھے اخلاق کے حامل تھے۔ (متفق علیہ)
توثیق الحدیث: أخرجہ البخاری (58210۔فتح)، و مسلم (2150)
حدیث نمبر 622
حضرت انس رضی اللہ عنہ ہی بیان کرتے ہیں کہ میں نے رسول اللہ صلی اللہ علیہ وسلم کی ہتھیلی سے زیادہ نرم کوئی موٹا اور باریک نہیں چھوا اور میں نے رسول اللہ صلی اللہ علیہ وسلم کے جسم اطہر کی خوشبو سے زیادہ پاکیزہ اور بہترخوشبو کبھی نہیں سونگھی اور میں نے رسول اللہ صلی اللہ علیہ وسلم کی دس سال خدمت کی، آپ نے مجھے کبھی اُف تک نہیں فرمایا اور جو کام میں نے کردیا اس کے بارے میں کبھی نہیں فرمایا کہ تم نے یہ کیوں کیا؟ اور جو کام میں نے نہیں کیا اس کے بارے میں بھی کبھی نہیں فرمایا کہ تو نے اس طرح کیوں نہ کیا؟ (متفق علیہ)
توثیق الحدیث: أخرجہ البخاری (2154۔216۔فتح)، و مسلم (2309۔233)
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔ ۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔ ۔۔
حدیث نمبر 623
حضرت صعب بن جثامہ رضی اللہ عنہ بیان کرتے ہیں کہ میں نے رسول اللہ صلی اللہ علیہ وسلم کی خدمت میں جنگلی گدھے (نیل گائے) کا ہدیہ پیش کیا تو آپ نے اسے مجھے واپس لوٹا دیا۔ جب آپ نے میرے چہرے پر مایوسی اور افسردگی کو دیکھا تو فرمایا: ''ہم نے تمہارا ہدیہ صرف اس لیے واپس کیا ہے کہ ہم حالت ِاحرام ہیں۔'' (متفق علیہ)
توثیق الحدیث: أخرجہ البخاری (314۔فتح)، و مسلم (1193)
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔ ۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔ ۔۔
حدیث نمبر 624
حضرت نواس بن سمعان رضی اللہ عنہ بیان کرتے ہیں کہ میں نے رسول اللہ صلی اللہ علیہ وسلم سے نیکی اور گناہ کے متعلق دریافت کیا تو آپ نے فرمایا: ''نیکی حسن اخلاق کا نام ہے اور گناہ وہ ہے جو تیرے دل میں کھٹکے اور تجھے یہ ناگوار اور ناپسند ہو کہ لوگ اس سے مطلع اور باخبر ہوجائیں۔ (مسلم)
توثیق الحدیث کے لیے حدیث نمبر (590) ملاحظہ فرمائیں۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔ ۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔ ۔۔
حدیث نمبر 625
حضرت عبداللہ بن عمرو بن عاص رضی اللہ عنہما بیان کرتے ہیں کہ رسول اللہ صلی اللہ علیہ وسلم فحش گو تھے نہ تکلف کے ساتھ فحش کلام کرتے تھے۔ آپ فرمایا کرتے تھے: ''تم میں سے سب سے بہتر وہ شخص ہے جو تم میں اخلاق میں سب سے اچھا ہے۔'' (متفق علیہ)
توثیق الحدیث: أخرجہ البخاری (5666۔فتح)، و مسلم (2321)
حدیث نمبر 626
حضرت ابودرداء رضی اللہ عنہ سے روایت ہے کہ نبی صلی اللہ علیہ وسلم نے فرمایا: ''قیامت والے دن مومن بندے کی میزان میں حسن اخلاق سے زیادہ وزنی اور ثقیل کوئی چیز نہیں ہوگی اور بلاشبہ اللہ تعالیٰ فاحش (فحش گو) اور بے ہودہ گو سے بغض رکھتا ہے۔" (ترمذی۔ حدیث حسن صحیح ہے)
توثیق الحدیث: صحیح لغیرہ۔ أخرجہ الترمذی (2002)، و أحمد (4516)۔
اس حدیث کی سند میں ضعف ہے کیونکہ اس میں یعلی بن مملک مقبول راوی ہے۔ لیکن اس کے پہلے حصے کی متابعت کی گئی ہے جو ادب المفرد (270) ابوداؤد (4799) اور احمد (4466 448) وغیرہ میں ہے اور اس کی سند صحیح ہے جبکہ دوسرے حصے کا شاہد مسند احمد (1991622۔2025) میں ہے جس کی بناء پر یہ حدیث صحیح ہے۔ (واللہ اعلم)
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔ ۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔ ۔۔
حدیث نمبر 627
حضرت ابوہریرہ رضی اللہ عنہ بیان کرتے ہیں کہ رسول اللہ صلی اللہ علیہ وسلم سے ایسے اعمال کے بارے میں پوچھا گیا جن کی وجہ سے اکثر لوگ جنت میں جائیں گے تو آپ نے فرمایا: ''اللہ تعالیٰ کا تقویٰ اور حسن خلق۔'' اور پھر آپ سے پوچھا گیا کہ کن چیزوں کی وجہ سے اکثر لوگ جہنم میں جائیں گے؟ توآپ نے فرمایا: ''منہ اور شرم گاہ۔''
(ترمذی۔ حسن صحیح ہے)
توثیق الحدیث: حسن۔ أخرجہ البخاری فی "الأدب المفرد" (289)، و الترمذی (2004)، و ابن ماجہ (4246)، و أحمد (2912،392،442)، و ابن حبان (476)، و الحاکم (3244)، و البیھقی فی "الزھد الکبیر" (236)، و اقضاعی فی "الشھاب" (1050)، و البغوی فی "معالم التزیل" (3774) و "شرح السنة" (7913۔80)، و الخرائطی فی "مکارم الأخلاق" (ص10)۔
حدیث نمبر 628
حضرت ابوہریرہ رضی اللہ عنہ ہی بیان کرتے ہیں کہ رسول اللہ صلی اللہ علیہ وسلم نے فرمایا: ''مومنوں میں سب سے زیادہ کامل ایمان والا وہ شخص ہے جوان میں سب سے زیادہ اچھے اخلاق والا ہے اور تم میں سے سب سے بہتر وہ لوگ ہیں جو تم میں اپنی عورتوں کے حق میں سب سے بہتر ہیں۔'' (ترمذی۔حدیث حسن صحیح ہے)
توثیق الحدیث کے لیے حدیث نمبر (278) ملاحظہ فرمائیں۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔ ۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔ ۔۔
حدیث نمبر 629
حضرت عائشہ رضی اللہ عنہا بیان کرتی ہیں کہ میں نے رسول اللہ صلی اللہ علیہ وسلم کو فرماتے ہوئے سنا: ''بلا شبہ مومن اپنے حسن اخلاق کی وجہ سے روزے دار شب بیدار شخص کے درجے اور مرتبے پر فائز ہو گا۔'' (ابوداؤد)
توثیق الحدیث: صحیح۔ أخرجہ أبو داود (4797)، و أحمد (946'90'187)، و البغوی فی ((شرح السنة)) ((8013' 81)، والحاکم (601)
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔ ۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔ ۔۔
حدیث نمبر 630
حضرت ابو امامہ باہلی رضی اللہ عنہ بیان کرتے ہیں کہ رسول اللہ صلی اللہ علیہ وسلم نے فرمایا: ''میں اس شخص کے لیے جنت کے اطراف میں ایک گھر کا ضامن ہوں جس نے حق پر ہونے کے باوجود جھگڑا چھوڑ دیا اور اس شخص کے لیے جنت کے وسط میں ایک گھر کا ضامن ہوں جس نے مزاح مذاق کے طور بھی جھوٹ بولنا چھوڑ دیا اور اس شخص کے لیے جنت کے اعلیٰ درجے میں گھر کا ضامن ہوں جس کے اخلاق اچھے ہوئے۔''
(ابو داؤد ۔ حدیث صحیح ہے)
توثیق الحدیث :صحیح لغیرہ۔ أخرجہ أبوداود (4800)
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔ ۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔ ۔۔
حدیث نمبر 631
حضرت جابر رضی اللہ عنہ سے روایت ہے کہ رسول اللہ صلی اللہ علیہ وسلم نے فرمایا: ''بلاشبہ روز قیامت مجھے سب سے زیادہ محبوب اور ہم نشینی کے لحاظ سے میرے سب سے زیادہ قریب وہ شخص ہوگا جو تم میں سے اخلاق میں سب سے اچھا ہوگا اور قیامت والے دن مجھے سب سے زیادہ ناپسند اور مجھ سے سب سے زیادہ دور وہ لوگ ہوں گے جو تکلف سے گفتگو کرنے والے، گال پھلا کر لوگوں سے لمبی گفتگو کرنے والے اور تکبر سے باچھیں کھول کر منہ بھر کر باتیں کرنے والے ہوں گے۔'' صحابہ نے عرض کیا: "اے اللہ کے رسول! ہم نے تکلف سے اور گال پھلا کر گفتگو کرنے والوں کو تو پہچان لیا ہے یہ ''متفیھقون'' کون لوگ ہیں؟ آپ نے فرمایا: ''تکبر کرنے والے''۔ (ترمذی۔ حدیث حسن ہے)
توثیق الحدیث :صحیح لغیرہ۔ أخرجہ الترمذی (2018)، و الخطیب فی ((تاریخہ)) (634)
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔ ۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔ ۔۔
باب 74
تحمل ، تدبر اور نرمی سے کام لینے کی ترغیب اور فضیلت
اللہ تعالیٰ نے فرمایا: ''اور غصے کو پی جانے والے اور لوگوں کو معاف کردینے والے۔ اور اللہ تعالیٰ نیکوکاروں کو پسند کرتا ہے۔'' (سورة آل عمران: 134)
اور فرمایا: ''عفو و درگزر کو اختیار کر، نیکی کا حکم دے اور جاہلوں سے اعراض کر۔ (سورة الأعراف:199)
نیز فرمایا: ''اور برائی اور اچھائی برابر نہیں ہوتیں۔ برائی کو ایسے طریقے سے دور کریں جو اچھا ہو تب وہ شخص کہ تیرے اور اس کے درمیان دشمنی ہو ایسے ہو جائے گا گویا کہ وہ گہرا دوست ہے اور یہ بات انہی لوگوں کے حصے میں آتی ہے جو صابر ہوتے ہیں اور ان کو نصیب ہوتی ہے جو بڑے نصیبے والے ہوتے ہیں۔'' (سورة فصلت:34۔ 35)
اور فرمایا: ''اور وہ شخص جس نے صبر کیا اور معاف کردیا یقیناً یہ بات ہمت کے کاموں سے ہے۔'' (سورة الشوری:43)
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔ ۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔ ۔۔
حدیث نمبر 632
حضرت ابن عباس رضی اللہ عنہما بیان کرتے ہیں کہ رسول اللہ صلی اللہ علیہ وسلم نے اشج عبد القبس سے فرمایا: ''تمہارے اندر دو خصلتیں ایسی ہیں جنہیں اللہ تعالیٰ پسند فرماتاہے: (1) برد باری (2) اور فہم وتدبر سے کام لینا۔'' (مسلم)
توثیق الحدیث: أخرجہ مسلم (17)(25)
۔۔۔ ۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔ ۔۔
حدیث نمبر 633
حضرت عائشہ رضی اللہ عنہا بیان کرتی ہیں کہ رسول اللہ صلی اللہ علیہ وسلم نے فرمایا: ''اللہ تعالیٰ نرمی کرنے والا ہے اور تمام معاملات میں نرمی کرنے کو پسند فرماتا ہے۔'' (متفق علیہ)
توثیق الحدیث: أخرجہ البخاری (44910۔فتح)، و مسلم (2165)
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔ ۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔ ۔۔
حدیث نمبر 634
حضرت عائشہ رضی اللہ عنہا ہی سے روایت ہے کہ نبی صلی اللہ علیہ وسلم نے فرمایا: ''بلاشبہ اللہ تعالیٰ نرمی کرنے والا ہے اور نرمی کو پسند فرماتا ہے اور وہ نرمی پر جو کچھ عطا فرماتا ہے وہ سختی پر اور اس کے علاوہ کسی اور چیز پر عطا نہیں فرماتا۔'' (مسلم)
توثیق الحدیث: أخرجہ مسلم (2593)
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔ ۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔ ۔۔
حدیث نمبر 635
حضرت عائشہ رضی اللہ عنہا ہی سے روایت ہے کہ نبی صلی اللہ علیہ وسلم نے فرمایا: ''جس چیز میں بھی نرمی ہوتی ہے تو وہ اسے زینت دار بنا دیتی ہے اور جس چیز سے یہ نرمی نکال لی جاتی تو یہ اسے عیب دار بنا دیتی ہے۔'' (مسلم)
توثیق الحدیث: أخرجہ مسلم (2594)
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔ ۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔ ۔۔
حدیث نمبر 636
حضرت ابوہریرہ رضی اللہ عنہ بیان کرتے ہیں کہ ایک دیہاتی نے مسجد میں پیشاب کردیا تو لوگ اس کی طرف اٹھے تاکہ اس وجہ سے اسے ڈانٹیں ڈپٹیں اور ملامت کریں۔ نبی صلی اللہ علیہ وسلم نے فرمایا: ''اسے چھوڑ دو اور اس کے پیشاب (والی جگہ) پر پانی کا ایک ڈول بہا دو اس لیے کہ تمہیں تو صرف آسانی کرنے والا بنا کر بھیجا گیا ہے سختی کرنے والا بنا کر نہیں بھیجا گیا۔'' (بخاری)
توثیق الحدیث: أخرجہ البخاری (31۔فتح)۔
حدیث نمبر 637
حضرت انس رضی اللہ عنہ سے روایت ہے کہ نبی صلی اللہ علیہ وسلم نے فرمایا: ''آسانی کرو سختی نہ کرو، خوشخبری سناؤ اور نفرت نہ دلاؤ۔'' (متفق علیہ)
توثیق الحدیث: أخرجہ البخاری (1631۔فتح)، و مسلم (1734)
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔ ۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔ ۔۔
حدیث نمبر 638
حضرت جریر بن عبد اللہ رضی اللہ عنہ بیان کرتے ہیں کہ میں نے رسول اللہ صلی اللہ علیہ وسلم کو فرماتے ہوئے سنا: ''جو شخص نرمی سے محروم کردیا گیا وہ ہر قسم کی بھلائی سے محروم کردیا گیا۔'' (مسلم)
توثیق الحدیث: أخرجہ مسلم (2592)
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔ ۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔ ۔۔
حدیث نمبر 639
حضرت ابوہریرہ رضی اللہ عنہ سے روایت ہے کہ ایک آدمی نے نبی صلی اللہ علیہ وسلم سے عرض کیا مجھے وصیت فرمائیں آپ نے فرمایا: ''غصہ نہ کیا کر، اس نے یہ سوال کئی بار دہرایا اور آپ نے ہر بار یہی ارشاد فرمایا: ''غصہ نہ کیا کر''۔
توثیق الحدیث: أخرجہ البخاری (51910۔فتح)۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔ ۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔ ۔۔
حدیث نمبر 640
حضرت ابو یعلیٰ شداد بن اوس رضی اللہ عنہ سے روایت ہے کہ رسول اللہ صلی اللہ علیہ وسلم نے فرمایا: ''بلاشبہ اللہ تعالیٰ نے ہر چیز کے ساتھ احسان کرنا ضروری قرار دیا ہے۔ پس جب تم قتل کرو تو احسن انداز اختیار کرو اورجب ذبح کرو تو اچھے طریقے سے ذبح کرو تم میں سے کوئی ایک اپنی چھری کو تیز کرلے۔ اور اپنے ذبیحہ کو آرام پہنچائے۔'' (مسلم)
توثیق الحدیث: أخرجہ مسلم (1955)
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔ ۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔ ۔۔
حدیث نمبر 641
حضرت عائشہ بیان کرتی ہیں کہ رسول اللہ صلی اللہ علیہ وسلم کو جب بھی دو کاموں میں سے کسی ایک کام کو اختیار کرنے کے لیے کہا جاتا تو آپ نے ان میں سے زیادہ آسان کام کو اختیارکیا بشرطیکہ اس میں گناہ نہ ہوتا اگر اس میں گناہ ہوتا تو آپ اس سے سب سے زیادہ دور ہوتے۔ رسول اللہ صلی اللہ علیہ وسلم نے اپنی ذات کے بارے میں کسی معاملے میں کبھی انتقام نہیں لیا مگر یہ کہ اللہ تعالیٰ کی حرمت کو توڑا جارہا ہو تو پھر آپ اللہ تعالیٰ کے لیے انتقام لیتے۔'' (متفق علیہ)
توثیق الحدیث: أخرجہ البخاری (5666۔فتح)، و مسلم (2327)
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔ ۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔ ۔۔
حدیث نمبر 642
حضرت ابن مسعود رضی اللہ عنہ بیان کرتے ہیں کہ رسول اللہ صلی اللہ علیہ وسلم نے فرمایا: ''کیا میں تمہیں ایسے شخص کے بارے میں نہ بتاؤں جو دوزخ پر حرام ہے یا جس پر دوزخ حرام ہے؟ یہ ہر اس شخص پر حرام ہے جو لوگوں کے قریب رہنے والا، تواضع اختیار کرنے والا، احسن انداز میں معاملات کرنے والا اور نرم مزاج ہے۔'' (ترمذی۔ حدیث حسن ہے۔)
توثیق الحدیث: حسن لغیرہ ۔ أخرجہ البخاری (2488)، و أحمد (4151)، و ابن حبان (469 470)
یہ حدیث عبد اللہ بن عمر والاودی کی جہالت کی وجہ سے ضعیف ہے، لیکن اس کے کئی شواہد ہیں جو اسے تقویت پہنچاتے ہیں۔ جیسے طبرانی کبیر (20/832 /291) میں حدیث معیقیت اور طبرانی اوسط (1959۔مجمع البحرین میں حدیث انس ہے۔ ان دونوں میں بھی ضعف ہے لیکن بالجملہ حدیث اپنے شواہد کے ساتھ مل کر حسن درجہ کی ہے۔ (واللہ اعلم)
۔ ۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔ ۔۔
باب 75
جاہلوں کو معاف کرنے اور ان سے درگزر کرنے کا بیان
اللہ تعالیٰ نے فرمایا: ''عفو و درگزر اختیار کرو، نیکی کا حکم دو اور جاہلوں سے درگزر کرو۔'' (سورة الأعراف:199)
اور فرمایا: ''تم ان سے اچھی طرح سے درگزر کرو۔'' (سورةالحجر:85)
اور فرمایا: ''چاہیے کہ وہ معاف کردیں اور درگزر کریں۔ کیا تم پسند نہیں کرتے کہ اللہ تعالیٰ تمہارے گناہ بخش دے؟'' (سورة النور:22)
نیز فرمایا: ''وہ لوگوں کو معاف کرنے والے ہیں اور اللہ تعالیٰ نیکو کاروں کو پسند فرماتا ہے۔ (سورة آل عمران:134)
اور فرمایا: ''اور وہ شخص جس نے صبر کیا اور معاف کردیا یقیناً یہ ہمت کے کاموں سے ہے۔'' (سورة الشوری:43)
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔ ۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔ ۔۔
حدیث نمبر 643
حضرت عائشہ رضی اللہ عنہا سے روایت ہے کہ انہوں نے نبی صلی اللہ علیہ وسلم سے پوچھا کہ کیا آپ پر غزوۂ احد والے دن سے بھی زیادہ سخت کوئی دن ہے؟ آپ نے فرمایا: ''میں نے تمہاری قوم سے بہت تکلیف اٹھائی ہے اور سب سے زیادہ تکلیف مجھے عقبہ والے دن پہنچی جب میں نے اپنے آپ کو تبلیغ کے سلسلے میں ابن عبدیا لیل بن عبد کلال پر پیش کیا (یہ طائف کا ایک مشہور سردار تھا) لیکن اس نے میری دعوت کو قبول نہ کیا جیسا کہ میں چاہتا تھا۔ پس میں وہاں سے مغموم زدہ ہو کر نکلا تو قرن ثعالب پر پہنچ کر مجھے کچھ افاقہ ہوا میں نے اپنا سر اوپر اٹھایا تو میں نے دیکھا کہ ایک بدلی نے مجھے سایہ کیا ہوا ہے میں نے اس میں دیکھا کہ حضرت جبریل ہیں اور انہوں نے مجھے آ واز دی اور فرمایا: ''یقیناً اللہ تعالیٰ نے آپ کی قوم کی وہ بات سن لی جو اس نے آپ سے کہی اور وہ بھی جو انہوں نے آپ کو جواب دیا اللہ تعالیٰ نے آپ کی طرف پہاڑوں کا فرشتہ بھیجا ہے کہ آپ اسے ان لوگوں کے بارے میں جو چاہیں حکم دیں۔" پس پہاڑوں کے فرشتے نے مجھے آواز دی پھر سلام کیا اور کہا: "اے محمد (صلی اللہ علیہ وسلم) یقیناً اللہ تعالیٰ نے تمہاری قوم کی وہ بات سنی لی جو اس نے آپ سے کہی۔ میں پہاڑوں کا فرشتہ ہوں میرے رب نے مجھے آپ کی طرف بھیجا ہے تاکہ آپ اپنے کام کے بارے میں مجھے حکم دیں پس آپ کیا چاہتے ہیں؟ اگر آپ چاہیں تو میں انہیں (مکہ کے) ان دو پہاڑوں کے درمیان پیس دوں۔" نبی صلی اللہ علیہ وسلم نے فرمایا: ''نہیں بلکہ مجھے امید ہے کہ اللہ تعالیٰ ان کی پشتوں سے ایسے لوگ پیدا فرمائے گا جو صرف ایک اللہ تعالیٰ کی عبادت کریں گے اس کے ساتھ کسی کو شریک نہیں ٹھہرائیں گے۔ (متفق علیہ)
توثیق الحدیث: أخرجہ البخاری (3126۔313۔فتح)، و مسلم (1795)
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔ ۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔ ۔۔
حدیث نمبر 644
حضرت عائشہ رضی اللہ عنہا ہی بیان کرتی ہیں کہ "رسول اللہ صلی اللہ علیہ وسلم نے کسی چیز کو، عورت کو نہ خادم کو اپنے ہاتھ سے کبھی نہیں مارا مگر یہ کہ اللہ تعالیٰ کی راہ میں جہاد کرتے تھے (جس میں دشمن سے قتال کرتے) اور ایسا بھی کبھی نہیں ہوا کہ آپ صلی اللہ علیہ وسلم کو کسی کی طرف سے تکلیف پہنچی ہو اور آپ نے اس تکلیف پہنچانے والے سے بدلہ لیا ہو مگر جب اللہ تعالیٰ کے محارم میں سے کسی حرمت کی پامالی ہوتی تو پھر آپ اللہ تعالیٰ کے لیے انتقام لیتے۔" (مسلم)
توثیق الحدیث: أخرجہ مسلم (2328)
حدیث نمبر 645
حضرت انس رضی اللہ عنہ بیان کرتے ہیں کہ میں رسول اللہ صلی اللہ علیہ وسلم کے ساتھ جا رہا تھا اور آپ کے اوپر موٹے کنارے والے چادر تھی۔ ایک دیہاتی آپ سے ملا اور اس نے بڑے زور سے آپ کی چادر کو پکڑ کر کھینچا: میں نے نبی صلی اللہ علیہ وسلم کے کندھے کی جانب دیکھا تو اس چادر کے نشان پڑ چکے تھے۔ جو اس نے شدت سے کھینچی تھی پھر اس نے کہا: "اے محمد صلی اللہ علیہ وسلم! اللہ تعالیٰ کا مال جو تیرے پاس ہے اس میں سے میرے لیے بھی (عطا کرنے کا) حکم دو! آپ نے اس کی طرف دیکھا تو مسکرا دیے پھر آپ نے اسے عطا کرنے کا حکم فرما دیا۔ (متفق علیہ)
توثیق الحدیث: أخرجہ البخاری (27510۔فتح)، و مسلم (1057)
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔ ۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔ ۔۔
حدیث نمبر 646
حضرت ابن مسعود رضی اللہ عنہ بیان کرتے ہیں گویا کہ میں اب بھی رسول اللہ صلی اللہ علیہ وسلم کو پہلے انبیاء کے واقعات میں سے کسی نبی کا واقعہ بیان کرتے ہوئے دیکھ رہا ہوں کہ اس کی قوم نے اس نبی کو مار مار کر لہو لہان کردیا تھا۔ اور وہ اپنے چہرے سے خون صاف کر رہا تھا اور کہہ رہا تھا: اے اللہ! میری قوم کو معاف کردے اس لیے کہ وہ جانتے نہیں۔'' (متفق علیہ)
توثیق الحدیث: أخرجہ البخاری (5146۔فتح)، و مسلم (1792)
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔ ۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔ ۔۔
حدیث نمبر 647
حضرت ابو ہریرہ رضی اللہ عنہ سے روایت ہے کہ رسول اللہ صلی اللہ علیہ وسلم نے فرمایا: ''وہ طاقتور نہیں جو (دوسرے کو) پچھاڑ دے طاقتور تو وہ ہے جو غصے کے وقت اپنے نفس پر قابو رکھے۔'' (متفق علیہ)
توثیق الحدیث کے لیے حدیث نمبر (45) ملا حظہ فرمائیں
۔۔۔۔۔۔۔۔۔۔۔۔۔ ۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔ ۔۔
باب76
تکلیفیں برداشت کرنا
اللہ تعالیٰ نے فرمایا: ''غصے کو پی جانے والے اور لوگوں کو معاف کردینے والے ہیں۔ اور اللہ تعالیٰ نیکوکاروں کو پسند کرتا ہے۔'' (سورة آل عمران: 143)
اور فرمایا: ''اور وہ شخص جس نے صبر کیا اور معاف کردیا بے شک یہ ہمت کے کاموں سے ہے۔'' (سورة الشوری:43)
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔ ۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔ ۔۔
حدیث نمبر 648
حضرت ابو ہریرہ رضی اللہ عنہ سے روایت ہے کہ ایک آدمی نے کہا: "اے اللہ کے رسول! میرے کچھ رشتے دار ہیں میں ان سے صلہ رحمی کرتا ہوں (تعلقات جوڑتا ہوں) اور وہ مجھ سے قطع تعلقی کرتے ہیں۔ میں ان کے ساتھ حسن سلوک سے پیش آتا ہوں اور وہ مجھ سے بدسلوکی کرتے ہیں، میں ان سے حلم و بردباری سے پیش آتا ہوں اور وہ مجھ سے جہالت سے پیش آتے ہیں۔ (یہ ساری باتیں سن کر) آپ نے فرمایا: ''اگر تو ایسا ہی ہے جیسا کہ تو نے کہا ہے تو گویا تم ان کے منہ میں گرم راکھ ڈال رہے ہو اور جب تک تم ایسے کرتے رہو گے تو اللہ تعالیٰ کی طرف سے ان کے خلاف تمہارے ساتھ ایک مددگار رہے گا۔'' (مسلم)
توثیق الحدیث کے لیے حدیث نمبر (318) ملاحظہ فرمائیں
۔۔۔۔۔۔۔۔۔۔۔۔۔۔۔ ۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔ ۔۔
باب77
احکام شرعیہ کی توہین کے وقت غضب ناک ہونا اور اللہ تعالٰی کے دین کی نصرت وحمایت کرنا
اللہ تعالیٰ نے فرمایا: ''جو شخص اللہ تعالیٰ کی محترم ٹھہرائی ہوئی چیزوں (یعنی دین کے احکام و شرائع) کی تعظیم کرے گا وہ اس کے رب کے پاس بہتر ہے۔'' (سورة الحج: 30)
اور فرمایا: ''اگر تم اللہ تعالیٰ کی مدد کرو گے تو اللہ تعالیٰ تمہاری مدد کرے گا اور تمہارے قدموں کو مضبوط کردے گا۔'' (سورة محمد:7)
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔ ۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔ ۔۔
حدیث نمبر 649
حضرت ابو مسعود عقبہ عمرو بدری رضی اللہ عنہ بیان کرتے ہیں کہ ایک آدمی نبی صلی اللہ علیہ وسلم کی خدمت میں حاضر ہوا اور عرض کیا: "(اے اللہ کے نبی!) میں صبح کی نمازمیں فلاں شخص کی وجہ سے پیچھے رہ جاتا ہوں کیونکہ وہ ہمیں نماز پڑھاتا ہے۔ پس میں نے نبی صلی اللہ علیہ وسلم کو کسی وعظ میں اتنا غضب ناک نہیں دیکھا جتنا آپ نے اس روز غصے کا اظہار فرمایا۔ آپ نے فرمایا: ''اے لوگو! تم میں سے بعض لوگ نفرت دلانے والے ہیں پس تم میں سے جو شخص بھی لوگوں کی امامت کرائے تو اسے چاہیے کہ وہ اختصار سے کام لے۔ اس لیے کہ اس کے پیچھے بوڑھے بچے اور ضرورت مند لوگ بھی ہوتے ہیں۔'' (متفق علیہ)
توثیق الحدیث: أخرجہ البخاری (1861۔فتح)، و مسلم (466)
حدیث نمبر 650
حضرت عائشہ رضی اللہ عنہا بیان کرتی ہیں کہ رسول اللہ صلی اللہ علیہ وسلم ایک سفر سے واپس تشریف لائے اور میں نے گھر کے سامنے چبوترے پر ایک باریک پردہ ڈالا ہوا تھا جس میں تصویریں تھیں۔ پس جب رسول اللہ صلی اللہ علیہ وسلم نے اسے دیکھا تو آپ نے اس تصویر کو بگاڑ دیا اور غصے کی وجہ سے آپ کے چہرے کا رنگ متغیر ہو گیا اور فرمایا: ''اے عائشہ! قیامت والے دن اللہ تعالیٰ کے ہاں سب سے زیادہ عذاب والے وہ لوگ ہوں گے جو اللہ تعالیٰ کی تخلیق (کی صفات) میں مشابہت اختیار کرتے ہیں۔'' (متفق علیہ)
توثیق الحدیث: أخرجہ البخاری (38610۔387۔فتح)، و مسلم (2106)
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔ ۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔ ۔۔
حدیث نمبر 651
حضرت عائشہ رضی اللہ عنہا ہی سے روایت ہے کہ قریش کو اس مخرومی عورت کے معاملے جس نے چوری کی تھی بہت فکر مند کردیا تھا۔ انہوں نے کہاکہ اس بارے میں رسول اللہ صلی اللہ علیہ وسلم سے کون بات (سفارش) کرے گا؟ (باہم مشورے کے بعد) انہوں نے کہا کہ ا س بات کی جرأت تو سیدنا اسامہ بن زید ہی کر سکتے ہیں جو رسول اللہ صلی اللہ علیہ وسلم کے چہیتے ہیں۔ چنانچہ حضرت اسامہ نے آپ سے بات کی تو رسول اللہ صلی اللہ علیہ وسلم نے فرمایا: ''کیا تم اللہ تعالیٰ کی حدوں میں سے ایک حد کے بارے میں سفارش کرتے ہو؟'' پھر آپ کھڑے ہوئے اور خطبہ ارشاد فرمایا: ''تم سے پہلے لوگوں کو اسی چیز نے ہلاک کیا کہ جب ان میں سے کوئی معزز چوری کرتا تو اسے چھوڑ دیتے اور جب ان میں سے کوئی ضعیف چوری کرتا تو اس پر حد قائم کردیتے۔ اللہ تعالیٰ کی قسم! اگر محمد (صلی اللہ علیہ وسلم ) کی بیٹی فاطمہ بھی چوری کرتیں تو میں اس کا بھی ہاتھ کاٹ دیتا۔'' (متفق علیہ)
توثیق الحدیث: أخر جہ البخاری (248۔ 25۔فتح)، و مسلم (1688)
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔ ۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔ ۔۔
حدیث نمبر 652
حضرت انس رضی اللہ عنہ سے روایت ہے کہ نبی صلی اللہ علیہ وسلم نے قبلہ کی طرف (دیوار پر) بلغم لگا ہوا دیکھا تو یہ آپ پر بہت گراں گزرا حتیٰ کہ آپ کے چہرے پر اس کے آثار دیکھے گئے۔ آپ کھڑے ہوئے اور اپنے دست مبارک سے اسے صاف کردیا اور فرمایا: ''جب تم میں سے کوئی ایک اپنی نماز میں کھڑا ہوتا ہے تو وہ اپنے رب سے سرگوشی کرتا ہے اور اس کا رب اس کے اور قبلے کے درمیان ہوتا ہے۔ پس تم میں سے کوئی ایک قبلہ کی طر ف نہ تھوکے بلکہ اگر تھوکنے کی ضرورت ہو تو اپنے بائیں جانب یا اپنے پاؤں کے نیچے تھوک لے۔'' پھر آپ نے اپنی چادر کا ایک کنارہ پکڑا اور اس میں تھو کا پھر اس کنارے کے ایک حصے کو دوسرے حصے سے مسل دیا اور فرمایا: ''یا وہ اس طرح کرلے (یعنی اس طرح کپڑے یا رومال وغیرہ میں تھوک لیا کرے)۔'' (متفق علیہ)
امام نووی نے فرمایا: ''اپنے بائیں جانب یا پاؤں کے نیچے تھوکنے کاحکم اس صورت میں ہے جب وہ مسجد سے باہر ہو لیکن جب وہ مسجد میں کھڑا ہو تو پھر اسے صرف کپڑے ہی میں تھوکنا چاہیے۔"
توثیق الحدیث: أخرجہ البخاری (5071۔508۔فتح)، و مسلم(551)
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔ ۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔ ۔۔
باب78
ارباب اختیار کو اپنی رعایا کے ساتھ نرمی ، ان کی خیر خواہی اور ان پر شفقت کرنے کا حکم اور ان کے ساتھ دھوکا کرنے، ان پر سختی کرنے، ان کے مصالح کو نظر انداز کرنے اور ان کی ضروریات سے غفلت برتے کی ممانعت
اللہ تعالیٰ نے فرمایا: ''اپنے پیروکار مومنوں کے لیے اپنے بازو پست رکھیں (یعنی ان سے تواضع سے پیش آئیں )۔'' (سورة الشعراء :215)
اور فرمایا: ''بلاشبہ اللہ تعالیٰ عدل و انصاف کرنے، احسان کرنے اور رشتے داروں کو دینے کا حکم دیتا ہے۔ اور بے حیائی، منکرات اور ظلم و زیادتی کرنے سے منع فرماتا ہے۔ وہ تمہیں نصیحت کرتا ہے تاکہ تم نصیحت پکڑو۔'' (سورة النحل:90)
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔ ۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔ ۔۔
حدیث نمبر 653
حضرت ابن عمر رضی اللہ عنہما بیان کرتے ہیں کہ میں نے رسول اللہ صلی اللہ علیہ وسلم کو فرماتے ہوئے سنا: ''تم سب ذمہ دار ہو اور تم سب سے اپنی اپنی رعیت (ذمہ داری) کے متعلق پوچھا جائیگا۔ امام، حکمران، ذمہ دار ہے اور اس سے اس کی رعیت کے متعلق پوچھا جائے گا، آدمی اپنے گھر والوں کا ذمہ دار ہے۔ اس سے اس کی رعیت کے بارے میں پوچھا جائے گا۔ عورت اپنے خاوند کے گھر کی ذمہ دار ہے اور اس سے اس کی رعیت کے بارے میں پوچھا جائے گا، خادم اپنے آقا کے مال کا ذمہ دار ہے اور اس سے اس کی ذمہ داری کے متعلق سوال ہو گا اور تم میں سے ہر ایک ذمہ دار ہے اور اس سے اس کی ذمہ داری (رعیت) کے بارے میں سوال کیا جائے گا۔'' (متفق علیہ)۔
توثیق الحدیث کے لیے حدیث نمبر (283) ملاحظہ فرمائیں۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔ ۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔ ۔۔
حدیث نمبر 654
حضرت ابو یعلیٰ معقل بن یسار رضی اللہ عنہ بیان کرتے ہیں کہ میں نے رسول اللہ صلی اللہ علیہ وسلم کو فرماتے ہوئے سنا: ''اللہ تعالیٰ جس شخص کو کسی رعیت کی نگرانی پر مامور فرما دے اور وہ انہیں دھوکا دیتے ہوئے ہی فوت ہوجائے تو اللہ تعالیٰ نے ایسے شخص پر جنت حرام کردی۔'' (متفق علیہ)
ایک اور روایت میں ہے: ''اس نے خیر خواہی کے ساتھ اپنی رعیت کے حقوق کی حفاظت نہیں کی تو وہ جنت کی خوشبو بھی نہیں پائے گا۔''
اور مسلم کی ایک روایت میں ہے: ''جو شخص مسلمانوں کے امور کا ذمہ دار بنتا ہے اور پھر وہ ان کے مسائل کے حل کے لیے پوری جدوجہد نہیں کرتا اور ان کی خیر خواہی نہیں کرتا تو وہ ان کے ساتھ جنت میں داخل نہیں ہوگا۔''
توثیق الحدیث: أخرجہ البخاری (12613۔فتح)، و مسلم(142)، والروایة الثانیة عند البخاری(13126۔127۔فتح)، و الروایة الثالثة عند مسلم (1261)
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔ ۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔ ۔۔
حدیث نمبر 655
حضرت عائشہ رضی اللہ عنہا بیان کرتی ہیں کہ میں نے رسول اللہ صلی اللہ علیہ وسلم کو اپنے گھر میں یہ فرماتے ہوئے سنا: ''اے اللہ! جو شخص بھی میری امت کے کسی معاملے کی ذمہ داری قبول کرے اور پھر وہ ان پر سختی کرے، تو تُو اس پر سختی فرما اور جو شخص میری امت کے کسی معاملے کی ذمہ داری قبول کرے اور وہ ان کے ساتھ نرمی کرے تو، تُو بھی اس پر نرمی فرما'' (مسلم)
توثیق الحدیث: أخرجہ مسلم (1828)
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔ ۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔ ۔۔
حدیث نمبر 656
حضرت ابوہریرہ رضی اللہ عنہ بیان کرتے ہیں کہ رسول اللہ صلی اللہ علیہ وسلم نے فرمایا: ''بنو اسرائیل کی سیاست ان کے انبیاء کرتے تھے۔ جب ایک نبی فوت ہوجاتا تو دوسرا نبی اس کا جانشین بن جاتا لیکن میرے بعد کوئی نبی نہیں اور میرے بعد خلفاء ہوں گے اور کثرت سے ہوں گے۔'' صحابہ کرام نے عرض کیا: "اے اللہ کے رسول صلی اللہ علیہ وسلم ! آپ ہمیں کیا حکم فرماتے ہیں؟" آپ نے فرمایا: ''پس تم جس سے پہلے بیعت کرو اسے پورا کرو پھر اس کے بعد والے سے بیعت کرو اور انہیں ان کا حق (اطاعت و خیرخواہی) دو، اور اپنے حقوق کے بارے میں اللہ تعالیٰ سے سوال کرو۔ اللہ تعالیٰ ان سے ان کے بارے میں سوال کرے گا جن کی نگرانی ان کے سپرد ہوگی۔'' (متفق علیہ)
توثیق الحدیث: أخرجہ البخاری (4956۔فتح)، و مسلم (1842)
حدیث نمبر657
حضرت عائذ بن عمر رضی اللہ عنہ سے روایت ہے کہ وہ عبید اللہ بن زیار کے پاس گئے اور ان سے کہا: اے بیٹا! میں نے رسول اللہ صلی اللہ علیہ وسلم کو فرماتے ہوئے سنا: ''بدترین حاکم وہ ہے جو رعایا پر ظلم و زیادتی کرتے ہیں پس تم اس سے بچو کہ تم ان میں سے ہوجاؤ۔'' (متفق علیہ)
توثیق الحدیث کے لیے حدیث نمبر (192) ملاحظہ فرمائیں۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔ ۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔ ۔۔
حدیث نمبر 658
حضرت ابو مریم ازدی رضی اللہ عنہ سے روایت ہے کہ انہوں نے حضرت معاویہ رضی اللہ عنہ سے کہا: "میں نے رسول اللہ صلی اللہ علیہ وسلم کو فرماتے ہوئے سنا ہے: ''اللہ تعالیٰ جس شخص کو مسلمانوں کے امور و معاملات کا والی اور نگران بنا دے اور وہ ان کی ضرورتوں،حاجتوں اور فقر سے بے پروا ہوجائے (یعنی انھیں پورا نہ کرے) تو قیامت والے دن اللہ تعالیٰ اس کی حاجتوں، ضرورتوں اور فقر سے بے پروا ہوجائے گا۔'' تو سیدنا معاویہ رضی اللہ عنہ نے ایک شخص کو لوگوں کی حاجات کو پورا کرنے پر لگادیا۔'' (ابو داؤد۔ ترمذی)
توثیق الحدیث: حسن الغیرہ ۔ أخرجہ أبوداود (2948)، و الترمذی (1333)، و الحاکم (934۔94)
اس کی سند منقطع ہے کیونکہ قاسم بن مخیمرہ کا ابو مریم سے سماع ثابت نہیں۔ اس حدیث کی ترمذی (1332)، حاکم (944) اور مسند احمد (2314) میں ایک اور سند بھی ہے لیکن وہ ابو حسن جزری کی جہالت کی وجہ سے ضعیف ہے لیکن حدیث معاذ اس کی شاہد ہے جو مسند احمد (2385۔239) میں ہے، یہ اگرچہ شریک قاضی کے سئی الحفظ کی وجہ سے ضعیف ہے لیکن اس کا اعتبار کیا جاتا ہے اور بالجملہ یہ حدیث اپنے شواہد کی وجہ سے حسن درجہ کی ہے۔ واللہ اعلم
۔۔۔۔۔۔۔۔۔۔۔۔۔۔۔ ۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔ ۔۔
باب 79
عادل حکمران
اللہ تعالیٰ نے فرمایا: ''بلا شبہ اللہ تعالیٰ عدل و انصاف اور احسان کرنے کا حکم فرماتاہے۔'' (سورة النحل:90)
اور فرمایا: ''اور انصاف کرو بلاشبہ اللہ تعالیٰ انصاف کرنے والوں کو پسند کرتا ہے۔'' (سورة الحجرات:9)
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔ ۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔ ۔۔
حدیث نمبر 659
حضرت ابو ہریرہ رضی اللہ عنہ سے روایت ہے کہ اللہ کے نبی صلی اللہ علیہ وسلم نے فرمایا: ''سات قسم کے شخص ایسے ہیں جنہیں اللہ تعالیٰ اس روز اپنے (عرش کے) سائے میں جگہ عطا فرمائے گا جب اس کے سائے کے علاوہ کوئی سایہ نہیں ہوگا: (1) عادل حکمران (2) وہ نوجوان جس نے اللہ تعالیٰ کی عبادت و اطاعت میں نشوونما پائی (3) وہ آدمی جس کا دل مساجد کے ساتھ معلق رہتا ہے (4) وہ دو آدمی جو صرف اللہ تعالیٰ کے لیے آپس میں محبت کرتے ہیں اسی پر وہ ایک دوسرے سے ملتے ہیں اور اسی پر ایک دوسرے سے جدا ہوتے ہیں (5) وہ آدمی جسے حسن زو جمال والی عورت برائی کی دعوت دے تو وہ آدمی جواب میں یہ کہے کہ میں تو اللہ تعالیٰ سے ڈرتا ہوں (6) وہ آدمی جس نے کوئی صدقہ کیا اور اسے اتنا مخفی رکھا کہ اس کے بائیں ہاتھ کو معلوم نہیں کہ اس کے دائیں ہاتھ نے کیا خرچ کیا (7) اور وہ آدمی جس نے خلوت میں اللہ تعالیٰ کو یاد کیا تو اس کی آنکھوں سے آنسو بہنے لگے۔'' (متفق علیہ)
توثیق الحدیث کے لیے حدیث نمبر (376) ملا حظہ فرمائیں ۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔ ۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔ ۔۔
حدیث نمبر 660
حضرت عبد اللہ بن عمرو بن عاص رضی اللہ عنہما بیان کرتے ہیں کہ رسول اللہ صلی اللہ علیہ وسلم نے فرمایا: ''بلاشبہ انصاف کرنے والے اللہ تعالیٰ کے ہاں نور کے منبروں پر ہوں گے (یعنی) وہ لوگ جو اپنے فیصلوں میں اپنے اہل خانہ کے بارے میں اور اپنے ماتحتوں کے بارے میں عدل و انصاف کرتے ہیں۔'' (مسلم)
توثیق الحدیث: أخرجہ مسلم (1827)
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔ ۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔ ۔۔
حدیث نمبر 661
حضرت عوف بن مالک رضی اللہ عنہ بیان کرتے ہیں کہ میں نے رسول اللہ صلی اللہ علیہ وسلم کو فرماتے ہوئے سنا: ''تمہارے بہترین حکمران وہ ہیں جن سے تم محبت کرو اور وہ تم سے محبت کریں۔ تم ان کے حق میں دعائیں کرو اور وہ تمہارے حق میں دعائیں کریں۔ اور تمہارے بدترین حکمران وہ ہیں جن کو تم ناپسند کرو اور وہ تمہیں نا پسند کریں، تم ان پر لعنت کرو اور وہ تم پر لعنت کریں۔" حضرت عوف (راوی حدیث) بیان کرتے ہیں کہ ہم نے عرض کیا: "اے اللہ کے رسول! کیا ہم ان کی بیعت توڑ کر ان کے خلاف بغاوت نہ کریں؟" آپ نے فرمایا: ''نہیں جب تک وہ تم میں اقامتِ صلوٰة کا نظام قائم رکھیں، نہیں جب تک وہ تمہارے اندر نماز قائم کرتے رہیں۔" (مسلم)۔
توثیق الحدیث: أخرجہ مسلم (1855)(66)
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔ ۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔ ۔۔
حدیث نمبر 662
حضرت عیاض بن حمار بیان کرتے ہیں کہ میں نے رسول اللہ صلی اللہ علیہ وسلم کو فرماتے سنا: ''تین قسم کے لوگ جنتی ہیں (1) منصف حکمران جسے عدل و انصاف کرنے کی توفیق سے نوازا گیا ہو۔ (2) رحم دل آدمی جو اپنے تمام رشتہ داروں اور مسلمانوں کے لیے نرم دل ہو (3) وہ عیال دار آدمی جو کسی سے سوال نہیں کرتا اور سوال سے بچنے کی بھر پور کوشش کرتا ہے۔'' (مسلم)
توثیق الحدیث: جزء من حدیث طویل أخرجہ مسلم (2865)
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔ ۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔ ۔۔
ღƬαsнι☣Rασ™
10-31-2012, 03:36 PM
Jazak Allah ....
Copyright ©2008
Powered by vBulletin Copyright ©2000 - 2009, Jelsoft Enterprises Ltd.