Khuwaab -e -Safar : )

[M A H i]

Ek shab aankh kinaray

Neend say pehlay aao

Khwab-e-safar per saath chalain gay


Ik doojay ka haath pakar ker …

Jhootay sachay ehed karain gay ...


Main kuch un dekhay sapnon ki ...

Ungli thaam kay lay aaon gee ...

Tum kuch ru-pehli taa'berain ...

Zaad-e-safar kay taur per lana …


Ho sakta hai khwab-e-safar main ...

Barish bhi ho, aandhi bhi ho ...

Ho sakta hai toofanon nay ...

Shart safar say baandhi bhi ho ...


Ho sakta hai kuch jugnoo, kuch taaray ...

Apni raah main aain ...

Ho sakta hai ghor andhairay main hi ...

Hum donon kho jain!


Is jungle main nadi kinaray ...

Thoray sapnay bo aain gay ...

Aur behti nadi main donon ...

Gham ki gard bhi dho aain gay!

Ek barga'd kay pair'd kay neechay ...

Teray shanay per sir rakh ker ...

Main apnay sab dukh ro loon gee ...

Tum apni jalti aankhon per ...

Meri barf hatheli rakhna ...


Tum yadon kay roshan jugnoo ...

Apni mutthi main bhar lena ...

Main bhi aanchal kay pehloo main ...

Ujli yaadain rakh laoon gi ...


Is dauraan hi khwab ki devi ...

Hum donon say haath chura ker ...

Such ki bheer main kho jaye gee ...


Chahay such kitna karwa ho ...

Dukh ko maat to ho jaye gi ...


Phir tum neend nagar ko jana ...

Main khwabon main reh jaoon'gi ...


Ik shab aankh kinaray

Neend say pehlay aao...

Khwab-e-safar per saath chalain gay.

[Owi]

very nice Mahi (y)

[M A H i]

yeah it is....
thnx for reply Owi

[Owi]

U Welcome jee :)

[Morash]

Amazing .. So Beautiful Thanks Fa Sharing