[ShArArTi MuNdA]

Hey guys i thought to make a thread of my own where i will post all poetry of ma collection so if u guys want u can leave ur comments and suggestions in here as well....Thanks

Gaye mausamon ki khabar nahi, naye mausamon ka pataa nahi
Wo mere sheher se chalaa gaya kisi gul ne mujh se kahaa nahi

Yehi soch kar meri aankh se kabhi koi ashk bahaa nahi
Rahe aankh mein hai wohi ghattaa, jo baras gaee wo ghattaa nahi

Is dil mein aas ka ik dia, wo gaya to ham ne jalaa lia
Wo dia jo dil mein udaasiyon bhari aandhiyon se bujhaa nahi

Main charaagh sa hoon bujhaa bujhaa, shab-e-hijr teerah-o-taar hai
Main ne khud chuni hai ye teergi mujhe us se koi gilaa nahi

Mutawaqqo hijr k sog mein hi guzar na jaoon main jaan se
Mujhe koi de ye khabar k haan wo gayaa nahi, wo gayaa nahi

" Dil Haar Gaya "

Kehne ko wo pehli chaahat thi
Wo jis mein junoo(n) tha, shiddat thi
Paakeeza thi, anmol thi wo
Khaabon k jahaa(n) ki ulfat thi
Mehboob ko bhi ma'loom na tha
Aaisi khaamosh mohabbat thi
Khaamosh rahi be-kaar hui
Na jeet hui na haar hui
Phir waqt ne apni chaal chali
Wo furqat se do-chaar hui
Kaisi khaamosh mohabbat thi
Gulzaar se phir wo khaar hui
Furqat se junoo(n) mein aag lagi
Is dil k sukoo(n) mein aag lagi
Ashkon ki larri aankhon se bandhi
Is jism k khoo(n) mein aag lagi
Phir waqt ne apni chaal chali
Dil se wo khumaar-e-preet gaya
Honton se wafa ka geet gaya
Kehne ko wo pehli chaahat thi
Us ka bhi zamaana beet gaya
Hijraa(n) ki shabon se larr larr kar
Dil haar gaya, gham jeet gaya .

Tum ko to ma'loom hi hoga zamaane ka chalan !
"Jaane waale ko bhulaana", ham bhi seekhein ge ye fan !

Qais ka qissa ho ya meri wafa ki daastaa(n)
Ishq ki shidat wohi hai, shehr ho chaahe ho ban

Wo bechaara bhi amaawas ki shabon mein bujh gaya
Chaand, jo khud ko kaha karta tha, "main hoon shab-shikan"

Zindagi k aakhri ayyaam, yaadon k azaab
Aur barrh jaati hai yaaro umr-e-rafta ki thakan !

Larrkiyon ki zindagi mein hai hi kya is k siva !
Chand sapne, chand dhoke aur nazron ki chubhan !

"Harjaai"

Jab usey nigaahon ne
Pehli baar dekha tha,
Us se guftgu ki thi
Dil ko us ki soorat ne
Apni or kheincha tha
Phir ehed mohabbat ka
Main ne us se baandha tha
Jab wo narm lehje mein
Dil ki be-qaraari ki,
Neend se bicharrne ki,
Muntazir nigaahon ki,
Karvattein badalne ki
Daastaa(n) sunaata tha
Aarzu ye hoti thi
Hashr tak ki fursat ho,
Dard-e-dil ki baatein hon,
Us ka narm lehja ho
Aur meri samaa'at ho
Haan magar samaa'at ko
Us ki is kahaani se
Ab nahi hai dilchasbi
Kiyun k aaj kal dil ko
Aik aur soorat ka
Bhol-pan bulaata hai
Dharrkanein barrhaata hai
Aur udhar wo be-chaara
Ab bhi apne seene mein
Pyaar ka dia le kar
Be-qaraar phirta hai
Ab kabhi jo milne ko
Wo mujhe bulaata hai
Sochti hoon ukta k
"Phir wohi mohabbat ki
Raagni sunaaye ga,
Phir mujhe bataaye ga
Intezaar kitna tha"

YooN to milte hain jahaN mein kaee iqsaam k phool
Aap se ham ne sada paye hain dushnaam k phool

Bheij dein ab to mohabat bhare paighaam k phool !
Zard hone se bacha lein dil-e-nakaam k phool !

Ishq ka jurm hai kaisa k mehek uTTha hooN
Haar ban kar hain gale mein kisi ilzaam k phool

Bakhsh de eik nazar inko to khil jayeN ge.....!!!
Raah mein kabse khaRa huN main teri, thaam k phool

Dekh kar us se gul-andaam ko jaana, kya hain
Baagh k paas to hote hain faqat naam k phool

Shauq aankhoN ko masalne ka unhein hai kitna
Gul bicHaye to kaha, "ye bhala kis kaam k phool"

Kya ajab fan hai ye ash'aar ka likhna *******
Ranj k, dard k sehraaoN mein ilhaam k phool

 

[ShahTaJ]

nice collection

 

---

Main bhi kitni pagal hoon na
Sang hawa k urna chahoon
Titli ban kar nagri nagri
Gulshan Gulshan phirna chahoon
Phooloon k sab rang chura kar
Chunri apni rangna chahoon
Main bhi kitni pagal hoon na

[Humaila]

[ShArArTi MuNdA]

Originally Posted by ShahTaJ

nice collection

Thanks ShahTaj jeee

 

[ShArArTi MuNdA]

Originally Posted by Humaila

Zabardast.. :=)..
Thanks4sharing..

Thanks humaila jee

 

[ShArArTi MuNdA]

" Khwaahish "

Aaise TooT k baadal barsa
Saawan rut ka
Zarra zarra bheeg chuka hai
Lekin mann k banjar ban mein
Dhool uRaati
Loo chalti hai
ArmaanoN k bargad aaise
Sulag rahe hain,
Mann se tan tak
In ka dhuwaaN phail raha hai
Aaisi rut mein
Bas ye khwaahish be-kal kar de,
Is se pehle
Is dhuwwein mein, dhool mein mera
Dam gHuT jaaye,
Is se pehle
Ye sab mujh ko paagal kar de,
Aa mujh ko bhi jal thal kar de....!!!

 

[ShArArTi MuNdA]

Ghazal yooN to baRi acHi bana di
Haqeeqat ista'aaroN mein cHupa di

JunooN ne zindagi karni sikha di
Jo mushkil raah mein aaee, haTa di

Jise bhi aag andar ki dikha di
Bujhana ik taraf, us ne hawa di

Tujhe khudse hamesha door samjha
Tujhe har moR par ham ne sada di

HawaaoN se thi utri pind-e-waaiz
Suni, sun kar hawaaoN mein uRa di

Ye baaghi nafs jaisa de k us ne
Idhar iblees ki pakh bhi laga di

Mere rone pe ik muskaan us ne
Laga, jaise ba-taur-e-khooN-baha di

Bhala maazi se kya lena hai mujhko
Magar "maazi" ne ye "haalat" bana di

Mohabbat ki to ki jaise ibaadat
Nazar Daali to yooN jaise rida di

Khafa kitnoN ko ******* kar dia hai
Ghazal yooN to baRi acHi bana di !!

 

[ShArArTi MuNdA]

Wo meri aankhoN ko eik sapna dikha gaya hai
Wo mere dil ko udaas rehna sikha gaya hai

Bohat c raatoN k baad utre gi ye khumaari
K apni aankhoN se mai wo ham ko pila gaya hai

Kise hai fursat k taan-e-barbat ko sun k jhoome
Ye us ka haNsna to kaee naghme jaga gaya hai

K uski zulfoN se ho gaee hain ghaTaayeN haasid
K mauj-e-darya ko us ka chalna jala gaya hai

Wo subh-e-raushan, naseem-e-gulshan, lateef shabnam
Sahar k taara payaam us ka suna gaya hai

 

[ShArArTi MuNdA]

" Khaali-Pan "

Likhne baiTh gaya huN
Aur ye soch raha huN
Likhna kya hai
Jazbe ghaR looN
GhaR k likh looN koi kahaani
Koi kahaani pehli deed ki
Pehli deed k ishq junuN ki koi kahaani
Koi kahaani khaamoshi ki
Tanhaai ki koi kahaani
Koi kahaani ana k ooNche meenaaroN ki koi kahaani
Chand adu ki baatein,
Chaarah-gar k shikwe
Aur ba-naam-e-qurb rafu ki koi kahaani
Koi kahaani gham-e-jahaN ki,
Majboori ki koi kahaani
Koi kahaani kehte kehte
Dil k gham ko sehte sehte
Be-his patthar ho jaane ki koi kahaani
Koi kahaani mann k khaali-pan mein ghaRne baiTh gaya huN
Koi kahaani
Likhne baiTh gaya huN
Aur ye soch raha huN
Likhna kya hai
Aaj chalo main ye uljhan bhi likh deta huN
Sab likha, ab khaali-pan bhi likh deta huN

 

[ShArArTi MuNdA]

Husn par marna to is dil ki zaroorat ho gaya
Pehle aadat tha par ab jaise tabeeat ho gaya

Kaar-e-dunia se ye jaaN pehle hi sad-mushkil mein thi
Is pe un ka dekhna dil ki museebat ho gaya

Ishq ka hona, k tha barbaadiyoN ki ik naveed
Aaise kaar-aamad hua, saamaan-e-fursat ho gaya

Bach gaya jo koi cheerah-dastiyoN se waqt ki
Wo yahaN qurbaN-ba-paa-e-ehl-e-sarvat ho gaya

Ham ko jeevan to dia par kaam itne de diye
AcHa khaasa waqt tha "do din ki mohlat" ho gaya

Sang they khalwat mein wo aur ye dua thi kucH na ho
Kuch na karte karte bhi kufraan-e-ne'mat ho gaya

She'r kehna wo bhi ******* jaise kam-aagaah ka !!
Ittefaaqan zariya-e-izhaar-e-fitrat ho gaya