[-|A|-]

’ملیریا ادویات کا مچھروں پر اثر کم ہوا‘


کمبوڈیا میں مچھروں پر آرٹیمیسینِن ادوات کم اثر کر رہی ہیں


سائنسدانوں کا کہنا ہے کہ نئی تحقیق کے مطابق مچھروں میں انسداد ملیریا ادویات سے مدافعت پیدا ہونے کے ثبوت سامنے آئے ہیں اور اس رحجان کے نتائج عالمی سطح پر انتہائی خطرناک ثابت ہو سکتے ہیں۔

عالمی ادارہ صحت (ڈبلیو ایچ او) کے اہلکاروں اور بین الاقوامی سائنسدانوں کی ٹیم کی تحقیق کے مطابق ملیریا کے لیے استعمال کی گئی اب تک دنیا میں موثر ترین دوائی سے مچھروں میں مدافعت پیدا ہوتی دکھائی دی گئی ہے۔

دنیا میں ملیریا سے ہر سال تقریباً دس لاکھ لوگ ہلاک ہوتے ہیں۔ اب تک ’آرٹیمیسینِین‘ گروپ کی ادویات ملیریا کے خلاف سب سے موثر رہی ہیں۔ ان ادویات سے خون میں ملیریا کے جراثیم دو سے تین دن میں صاف ہو جاتے تھے لیکن اب نئی تحقیق سے پتہ چلا ہے کہ اب دوائی سے جراثیم صاف ہونے میں پانچ دن تک کا وقت لگ رہا ہے۔


پہلے بھی کلوروکوین اور ایس پی سے یہ رزیسٹنس بن گئی تھی جس کی وجہ سے افریقہ میں بہت جانی نقصان ہوا۔ اگر پھر یہی ہوا اور ان ادویات سے بالاتر یہ جراثیم ایشیا اور افریقہ میں پھیل گئے تو یہ ملیریا پر قابو پانے کی کوششوں کے لیے ایک بڑا دھچکہ ہوگا۔ یہ ایک انتہائی سنگین معاملہ ہے۔
ڈاکٹر نِک ڈے


یہ تحقیق جنوب مشرقی ایشیا کے ملک کیمبوڈیا میں کی گئی ہے۔ بین الاقومی سائنسدانوں کی دو ٹیموں نے الگ الگ کلنکل تجربے کیے جس میں دیکھا گیا کہ ان ادویات کے موثر ہونے میں زیادہ وقت لگنے لگا ہے جس سے یہ پتہ چلتا ہے کہ اس علاقے میں مچھروں میں ان ادویات سے مدافعت پیدا ہونی شروع ہوئی ہے۔

ماضی میں بھی انسداد ملیریا کی ادویات سے مدافعت اس ہی خطے میں پیدا ہونی شروع ہوئی تھی۔ تحقیق میں شامل ماہیدول اوکسفرڈ ٹراپیکل مڈیسن یونٹ کے پروفیسر نِک ڈے بتاتے ہیں ’ماضی میں جنوبی مشرقی ایشیا نے ہی انجانے ملیریا ادویات سے بالاتر مچھروں کا یہ تحفہ دنیا کو دیا تھا، خاص طور پر افریقہ کو۔‘ انہوں نے کہا کہ ملیریا کی پہلی والی ادویات کے ساتھ یہی ہوا تھا ’ پہلے بھی کلوروکوین اور ایس پی سے یہ مدافعت بن گئی تھی جس کی وجہ سے افریقہ میں بہت جانی نقصان ہوا۔ اگر پھر یہی ہوا اور ان ادویات سے بالاتر یہ جراثیم ایشیا اور افریقہ میں پھیل گئے تو یہ ملیریا پر قابو پانے کی کوششوں کے لیے ایک بڑا دھچکہ ہوگا۔ یہ ایک انتہائی سنگین معاملہ ہے۔‘

کمبوڈیا میں نظام صحت کمزور ہونے کے علاوہ حکام جعلی ادویات کی صنعت پر قابو نہیں پا سکے ہیں اور مارکیٹ میں جعلی ادویات بھری پڑی ہیں۔اس میں ایک بڑا مسئلہ یہ ہے کہ ملیریا کے لیے ان جعلی ادویات میں اصلی دوا بھی ڈالی جاتی ہے لیکن کم مقدار میں اور سائنسدان کہتے ہیں کہ اس سے بھی جراثیم کی مدافعت زیادہ ہوتی جا رہی ہے۔

 

---

’’بہترین کلام اللہ کا کلام ( قرآن کریم ) ہے اور بہترین ھدایت و طریقہ حضرت محمد صلی اللہ علیہ و سلم کا لایا ھوا دین ہے ۔،